Prezident Shavkat Mirziyoev 21-fevral kúni Qorǵanıw sanaatı agentliginiń Innovaciyalıq texnologiyalar orayına barıp, bul jerdegi óndiris quwatlıqları, aldıńǵı qollanbalar, áskeriy hám eki túrli maqsetke mólsherlengen ónimler menen tanıstı.

Armiyanıń qábiletin bekkemlewde áskeriy xızmetkerlerdiń professionallıq tayarlıǵı menen bir qatarda qorǵanıw sanaatın rawajlandırıw áhmiyetli orın iyeleydi. Prezidentimizdiń baslaması menen Ózbekstanda zamanagóy qorǵanıw sanaatına tiykar salınǵanı tariyxıy áhmiyetke iye boldı. Qorǵanıw ministrligi janındaǵı agentlik tárepinen qural-jaraqlardı modernizaciyalaw, jańa texnologiyalardı ózlestiriw hám perspektivalı qollanbalardı áskerlerde engiziw boyınsha sistemalı jumıslar ámelge asırılmaqta.
Bul Innovaciyalıq texnologiyalar orayında 80 ge shamalas áskeriy hám eki túrli maqsetke mólsherlengen ónimler islep shıǵarılmaqta. Sonday-aq, robototexnika hám ushıwshısız apparatlar boyınsha startap joybarlar qollap-quwatlanbaqta.
Sapar waqtında áskeriy texnikanıń jańa úlgileri, qorǵanıw tarawın jáne de rawajlandırıw boyınsha perspektivalı joybar hám rejeler tanıstırıldı.
Mámleketimiz basshısı bul birinshi qádemler bolǵanın aytıp, qorǵanıw sistemasınıń básekige shıdamlılıǵın arttırıp barıw boyınsha kórsetpeler berdi. Óndiristi turaqlı jetilistirip, jańa ónimlerdi ózlestiriw, onda innovaciyalıq texnologiyalar hám jasalma intellektten keńnen paydalanıw zárúr ekenligi atap ótildi.
Sonıń menen birge, buyırtpa tiykarında tarawǵa jeke menshik sektordı keńirek tartıp, áskeriy hám eki túrli maqsetke mólsherlengen ónim túrlerin kóbeytiw boyınsha tapsırmalar berildi. Jańa jumıs orınların jaratıw, qánigelerdi sistemalı tayarlaw, jańa texnikalar boyınsha ilimiy laboratoriyalar shólkemlestiriw máselelerine itibar qaratıldı.
Ózbekstan qorǵanıw sanaatı kárxanaları xalıqaralıq qánigelestirilgen kórgizbelerde belsene qatnasıp atırǵanın atap ótiw kerek. Atap aytqanda, usı jıldıń 17-21-fevral kúnleri Abu-Dabi qalasında (BAÁ) bolıp ótip atırǵan «IDEX-2025» kórgizbesinde mámleketimide islep shıǵarılǵan 100 den aslam áskeriy texnika hám ónimler úlgileri kórsetilmekte. Sırt elli birge islesiwshilerde úlken qızıǵıwshılıq oyatqan «Arıslan 8×8» hám «Arıslan 6×6» bronlanǵan transportyorlar, «Twfon» ózi júretuǵın gaubicası usılardıń qatarına kiredi.
Sapar sońında Prezidentimiz qorǵanıw sanaatın jáne de rawajlandırıwdıń strategiyalıq baǵdarların kórsetip, juwapkerlerdiń aldına ónimlerdiń joqarı sapasın támiyinlew, óndiris imkaniyatın keńeytiw hám jergilikli kárxanalardıń xalıqaralıq bazardaǵı ornın bekkemlew boyınsha anıq wazıypalar qoydı.

ÓzA