Prezident Shavkat Mirziyoev 19-fevral kúni energiya nátiyjeliligin arttırıw boyınsha usınıslar prezentaciyası menen tanıstı.

Bul haqkında 28-yanvarda elektr energetikasın rawajlandırıw boyınsha bolıp ótken májiliste tapsırma berilgen edi.

Elimizde energiya quwatlılıqları xalıq hám ekonomika tarmaqlarınıń ósiwsheń talaplarına sáykes túrde artıp barmaqta. Atap aytqanda, ótken jılı 50 milliard kub metr tábiyǵıy gaz, 81 milliard kilovatt saat elektr islep shıǵarıldı.

2035-jılǵa barıp, elektrden paydalanıw házirgiden 1,7 esege kóbeyiwi esap-sanaq etilgen. Bul talaptı tolıq qanaatlandırıw ushın tek ǵana óndiris emes, únemlilik te zárúr.

Tallawlarǵa qaraǵanda, Ózbekstanda 1 dollarlıq jalpı ishki ónim jaratıwǵa dúnyadaǵı ortasha kórsetkishten 2,5 esege kóp energiya jumsalıp atır. Еlektr tarmaqlarındaǵı shıǵınlar 14 procent, tábiyǵıy gazde bolsa 7 procentten joqarı.

Sonlıqtan ilimpazlar menen orınlarda energiyanı únemlew imkaniyatları ilimiy tiykarda úyrenilmekte. Búgingi shekem 7 wálayatta 4,6 milliard kilovatt saat elektr hám 1 milliard kub metr gazdi únemlew imkaniyatları anıqlanǵan.

Prezentaciyada usınday úyreniwler tiykarında islep shıǵılǵan usınıslar dodalandı.

Mısalı, suw xojalıǵında eski nasoslardı zamanagóyine almastırıp, jılına milliard kilovatt-saat elektrdi únemlew múmkin. Sociallıq mákemelerde qazanxanalardı jańalaw, «jasıl» energiyadan paydalanıw arqalı bıyıl 5 million kub metr gaz, 15 million kilovatt-saat elektrdi únemlewge boladı.

Ulıwma, bıyıl 1,6 milliard kub metr gaz hám 3,5 milliard kilovatt-saat elektrdi únemlew belgilengen. Bul ushın hár bir kárxana hám shólkemge ilimiy tiykarlanǵan ilajlar jetkeriledi.

Sonıń ishinde, iri sanaat kárxanalarında bir ónim birligin óndiriwge ketetuǵın energiya norması belgilenedi. Sonıń ózinen energiyanı jumsaw 5-10 procentke qısqaradı. Sociallıq obyektlerde energiya únemleytuǵın úskenelerdi ornatıw boyınsha mánzilli baǵdarlama tastıyıqlandı.

Kóp qabatlı jaylarda ıssılıqtı jaqsı saqlaw ushın olardı izolyaciyalaw keńeytiledi. Shańaraqlarda geliokollektor hám quyash panelin ornatıwǵa arzanlatılǵan kreditler beriledi. Paydalanıwshılar Yaponiya tájiriybesi tiykarında energiyanı únemlew sawatlılıǵı boyınsha oqıtıladı.

Mámleketimiz basshısı ekonomikanıń barlıq tarmaqları, sociallıq taraw hám turaq jaylarda únemliliktiń zárúrligin atap ótti. Aymaq hám tarmaqlar kesiminde energiya ısırapgershiligin azaytıw, talan-tarajlıqlardıń aldın alıw boyınsha qatań kórsetpeler berildi.

ÓzA