Ázerbayjan paytaxtı Baku qalasında Aziya Parlament Assambleyasınıń 15-májilisi bolıp ótti.

Bul abıraylı ánjumanda Ózbekstan Respublikası Oliy Majlisi Senatınıń Baslıǵı Tanzila Norboeva basshılıǵındaǵı delegaciya qatnastı.
Dúnyanıń 30 ǵa shamalas mámleketi parlamentleriniń wákilleri qatnasqan ánjumanda «Aziyada kóp tárepleme birge islesiwdi bekkemlewde parlament diplomatiyasınıń ornı» teması keńnen dodalandı.
Assambleyanıń tiykarǵı májilisinde Senat Baslıǵı Tanzila Norboeva shıǵıp sóylep, parlament diplomatiyası, nızam dóretiwshiligi tarawında tájiriybe almasıw ekologiyalıq qáwipsizlik hám klimat ózgeriwleri máseleleri baǵdarında tıǵız birge islesiw baylanısların jolǵa qoyıw sıyaqlı bir qatar baslamalardı alǵa qoydı.
– Assambleyada Ózbekstan parlamentiniń regionallıq hám xalıqaralıq qatnasıqlardı keńeytiwde áhmiyetli baslamalardı alǵa qoyıw hám xalıqaralıq ilajlardı shólkemlestiriwdegi belsendi roli ayrıqsha atap ótildi,-deydi T.Norboeva. – Parlamentleraralıq Awqamnıń 150-yubiley Assambleyası usı jıldıń 5-9-aprel kúnleri Oraylıq Aziya tariyxında birinshi márte Tashkent qalasında ótkeriliwi de onıń ayqın úlgisi bolıp esaplanadı. Abıraylı ánjumanda joqarı dárejede erisilgen kelisimlerdi ámelge asırıwda, nızamlardı qabıllaw boyınsha tájiriybe almasıwda parlamentleraralıq jedel birge islesiwdi kúsheytiw máselesine de itibar qaratıldı.

N.Abduraimova, ÓzA