Nókis qalasındaǵı «Jipek jolı» miymanxanasında “Media klub”tıń ekologiyalıq mashqalalar, klimat ózgeriwi hám olardıń hayal-qızlarǵa tásirin sáwlelendiriw máselesine baǵıshlanǵan seminar shólkemlestirildi.
Seminarǵa ekspertler, jurnalistler, blogerler, Qaraqalpaqstan medicina institutınıń assistent-oqıtıwshıları hám studentleri, mámleketlik emes kommerciyalıq emes shólkemlerdiń (MKSh) wákilleri qatnastı.
Dodalawlarda klimat ózgeriwiniń hayal-qızlardıń densawlıǵına tásiri, ǵalaba xabar qurallarında dezinformaciya tarqalıwı hám gender stereotiplerine qarsı gúresiw temaları kóterildi.
Senator Oral Ataniyazova “Media hám Еkologiya: Nókis”te dezinformaciya hám gender mashqalaları”, klimat ózgeriwiniń hayal-qızlardıń densawlıǵına tásiri haqqında maǵlıwmat berdi hám klimat ózgeriwine qarsı gúresiwde gender teńligi áhmiyetli ekenligin atap ótti.
Ilaj dawamında jurnalistler klimat ózgeriwi hám gender mashqalalarınıń baylanısı haqqında bilimlerin arttırıp, material tayarlaw boyınsha ámeliy kónlikpelerge iye boldı.
Ilaj “EU Tabassum (Smile): ǴXQ kónlikpeleri arqalı gender teńligin úgit-násiyatlaw hám Ózbekstannıń jas hayal-qızların qollap-quwatlaw” joybarı DW Akademie tárepinen Zamanagóy jurnalistikanı rawajlandırıw orayı (MJDC) menen birgelikte ámelge asırıldı.
Joybar Evropa awqamı tárepinen qarjılandırılǵan bolıp, Germaniya Federal Еkonomikalıq birge islesiw hám Rawajlanıw Ministrligi (BMZ) tárepinen qollap-quwatlanadı.
Ilajda qánigeler tárepinen Aral apatshılıǵı – ekologiyalıq apatshılıqtıń sociallıq tarawǵa qanday tásir etiwiniń eń ayqın mısallarınıń biri ekenligi, bul mashqalalardı obyektiv sáwlelendiriwdiń zárúrligi atap ótildi.
– Zıyan kórgen aymaqlarda hayal-qızlar úlken júklemelerge dus kelip atır, densawlıqtıń tómenlewi, biyperzentliktiń artıwı, suw jetispewshiligi sebepli úy jumıslarınıń kóbeyiwi sıyaqlı mashqalalar, kórilip atırǵan sharalar haqqında aytılıwı kerek. Men ekologiyalıq krizisten jábir kórgen aymaqlardıń tikleniwine hám sociallıq-ekonomikalıq jaqtan tiklenip rawajlanıwına isenemen. Hayal-qızlar hám balalar salamatlılıǵı jámiyetimizdiń kelesheginiń tiykarı bolıp tabıladı. Hár bir hayalda, hár bir balada gózzal, salamat hám baxıtlı keleshek potencialın kóremen. Biz qıyınshılıqlardı jeńip ótemiz, joyıtqanlarımızdı tikleymiz hám ekologiyalıq krizisten jábir kórgen aymaqlarda abadanlıq jaratamız,-deydi O.Ataniyazova.
Eki kún dawamında ótkerilgen ilaj “Teńlik jurnalistikası: gender hám klimat máseleleri” treninginiń dawamı bolıp, trening sheńberinde jurnalistler gender máseleleri hám ekologiya arasındaǵı baylanıslılıqtı úyrendi. Sonıń menen birge, bul tema boyınsha materiallar tayarlaw ushın ámeliy kónlikpelerge iye boldı.
Ilajda Hayal-qızlardı kemsitiwdiń barlıq túrlerin toqtatıw haqqındaǵı BMSh Konvenciyası, Ózbekstan Respublikasında er adamlar menen hayal-qızlardıń teń huqıqlılıǵı boyınsha qabıl etilgen qarar hám pármanlar, nızamlar haqqında keń túrde maǵlıwmatlarǵa iye boldı.
Qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.