Házirgi waqıtta orınlarda oqıwshı jaslar arasında olardıń elimizge paydalı kámil insanlar bolıp jetilisiwin támiyinlew maqsetinde tiyisli taraw wákilleriniń qatnasıwında ruwxıy-mádeniy, úgit-násiyat ilajları hám ushırasıwlar ótkerilmekte.
Moynaq rayonındaǵı Tikózek awıl puqaralar jıyınında jaylasqan rayonlıq ulıwma orta bilim beriw bólimine qaraslı 7-sanlı mektepte te Moynaq rayonı Shańaraq hám hayal-qızlar bólimi tárepinen Milliy gvardiya bólimi xızmetkerleri menen birgelikte úgit-násiyatlaw ilajlı ótkerildi.
Mekteptiń joqarı klass oqıwshıları arasında ótkerilgen ilajda sózge shıqqanlar keleshegimiz bolǵan jaslarǵa tártip-intizam, tazalıq, iybelik haqqında, sonday-aq, kásip-óner úyreniwdiń zárúrligi, kitapqumarlıqtı en jaydırıw, kiyiniw ádebin saqlaw hám basqa da máseleler boyınsha paydalı másláhátlerin berdi.
Mektepte ótkerilgen ilajda Moynaq rayonı Shańaraq hám hayal-qızlar bóliminiń baslıǵı B.Jamalova oqıwshılardıń sabaqqa qatnası, kiyiniw mádeniyatı, tártibi, ádebiy kitaplardı kóp oqıwı, Prezidentimiz tárepinen jaslarǵa, ásirese, hayal-qızlarǵa jaratılıp atırǵan imkaniyatlardan utımlı paydalanıwı boyınsha túsinikler berdi.
Sonday-aq, pitkeriwshi klass oqıwshılarına erte turmıs qurmay, oqıwdı pitkerip joqarı maǵlıwmatlı bolıp ózleri qálegen kásiptin mamanı bolıwına shaqırdı.
Ilajda qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi.