Hawa-rayınıń keskin suwıtıwı tutınıwshılardıń tábiyǵıy gazge bolǵan talabın arttıradı. Respublikamızdaǵı tábiyǵıy gazdiń jetip barıwı qıyın bolǵan xojalıqlardı suyılttırılǵan gaz ballonları menen támiyinlew maqsetinde, “Xududgaz Qaraqalpaqstan” gaz támiynatı filialı Nókis rayonlıq gaz támiynatı bólimi tárepinen bir qatar unamlı jumıslar ámelge asırılmaqta.

-Házirgi waqıtta Nókis rayonındaǵı Baqanshaqlı, Qırantaw, Arbashı, Kerder, Taqırqól hám Aqterek awıl puqaralar jıyınlarındaǵı jámi 1320 xojalıq suyılttırılǵan gaz benen úzliksiz támiyinlenip kiyatır,-deydi Nókis rayonlıq gaz támiynatı bólimi máhálle tutınıwshılarına suyılttırılǵan gaz jetkerip beriw xızmeti baslıǵı Kutekeev Tursınbay.-Tutınıwshılarımız tolıǵı menen ID kartalar menen támiyinlengen hám E-gaz baǵdarlaması tiykarında suyılttırılǵan gaz ushın tólemlerdi ámelge asıradı. Rayondaǵı suyılttırılǵan gaz tutınıwshıları paydalanıwında jámi 2471 dana aylanba gaz ballonları menen támiyinlengen. Bıyılǵı jıldıń usı kúnine shekem xojalıqlarǵa 40 tonna suyıltırılǵan gaz ballonları arnawlı avtotransportlarda jetkerip berildi hám bul jumıslar aymaqlarda rayon hákimligi menen kelisilgen keste tiykarında dawam etpekte.
“Xududgaz Qaraqalpaqstan” gaz támiynatı filialınan alınǵan maǵlıwmatlarǵa qaraǵanda, respublikamızdaǵı tábiyǵıy gazdiń jetip barıwı qıyın bolǵan xojalıqlardı suyılttırılǵan gaz ballonları menen támiyinlew jumısları aymaqlarda belgilengen keste tiykarında dawam etpekte.

Adilbay Orazov,
Qaraqalpaqstan xabar agentligi sholıwshısı