Qaraqalpaqstan Respublikası Suw xojalıǵı ministrliginde Ministrler Keńesiniń Sırtqı biyǵárez járdem qarjıların (grantlar) tartıw hám donorlar menen islesiw bólimi juwapkerleriniń qatnasıwında tarawǵa grant qarjıların tartıw boyınsha oqıw-seminar ótkerildi. Onda suw xojalıǵı tarawına investiciya hám grantlardı tartıw máselesi dodalandı,-dep xabar bermekte usı ministrliktiń baspasóz xızmeti.

Ilajǵa respublikamızdaǵı barlıq suw xojalıǵı shólkemleriniń basshıları qatnastı.
Qaraqalpaqstan Respublikası Suw xojalıǵı ministri B.Juzbaev Qaraqalpaqstan Respublikası Joqarǵı Keńesiniń Baslıǵı tárepinen 2025-jıldıń 25-yanvarında Suw xojalıǵı ministrligine investiciyalar hám grantlar ajıratıwǵa baylanıslı “Jol kartası” tastıyıqlanǵanlıǵı hám onda usı baǵdarda sistema shólkemlerine oqıw seminarların shólkemlestiriw názerde tutılǵanlıǵı hám usı “Jol kartası”nda belgilengen wazıypalardıń áhmiyetine toqtap ótti.
Ilajda Qaraqalpaqstan Respublikası Ministrler Keńesiniń Sırtqı biyǵárez járdem qarjıların (grantlar) tartıw hám donorlar menen islesiw bóliminiń baslıǵı K.Idirisov, bólim qánigeleri B.Naǵmetov hám B.Sultamuratovlar shıǵıp sóylep, suw xojalıǵı tarawına investiciya hám grant qarjıların tartıw, atap aytqanda, aymaqlardaǵı máhálleler menen birgelikte grant tańlawlarında qatnasıp, alıs aymaqlarǵa suw jetkeriw baǵdarındaǵı mashqalalardı sheshiw boyınsha qanday ilajlardı ámelge asırıw, jumıstı neden baslaw kerekligi boyınsha tolıq maǵlıwmatlar berildi.
Ashıq sáwbetlesiw tárizinde ótkerilgen oqıw-seminarı dawamında suw xojalıǵı sisteması shólkemleriniń basshıları tema boyınsha ózlerin qızıqtırǵan sorawlarǵa juwap aldı.

Qaraqalpaqstan xabar agentligi.