Nókis qalasındaǵı Jaslar orayında «Biznesti rawajlandırıw banki» akcionerlik-kommerciyalıq banki tárepinen Qaraqalpaqstan Respublikası Joqarǵı Keńesi, Ministrler Keńesi, Yaponiyanıń Yamagata universiteti professorları, Ózbekstan Respublikası Shańaraq hám hayal-qızlar komiteti, «Hamroh” hayal-qızlar isbilermenligin qollap-quwatlaw kompaniyası hám Jaslar agentligi járdeminde «Miynet hám nátiyje!» súreni astında I Hayal-qızlar forumı bolıp ótti.

Ilajǵa qaraqalpaqstanlı isbilermenler, sonıń menen birge, isbilermenlik jumısların baslawdı qálewshi 150 den aslam hayal-qız, “Kishi biznesti úzliksiz qollap-quwatlaw” joybarı sheńberinde isbilermenlik jumısın jolǵa qoyǵan lider isbilermen hayal-qızlar benen bir qatarda temir dápterde turǵan isbilermenlik jumısın baslaw tilegindegi hayal-qızlar hám jas isbilermenler qatnastı.
Ilaj qatnasıwshıları dáslep “Kishi biznesti úzliksiz qollap-quwatlaw” joybarı sheńberinde óz jumısın baslaǵan hayal-qızlardıń ónermentshilik ónimleriniń kórgizbesi menen tanıstı. Jeńilletilgen kreditlerden paydalanıp, óz jumısların jolǵa qoyǵan isbilermenlerdiń islep shıǵarıp atırǵan ónimleriniń kórgizbesinde 30 ǵa shamalas ónerment, isbilermen hayal-qızlar ózleriniń 50 den aslam ónimleri menen qatnastı.
Ilajda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev, Ózbekstan Respublikası “Biznesti rawajlandırıw banki” AKB Biznesti rawajlandırıw departamentiniń direktorı D.Aminov, Hayal-qızlar máselelerin sistemalı sheshiw, olardı sociallıq qollap-quwatlaw boyınsha Ózbekstan kásiplik awqamları Federaciyasınıń Qaraqalpaqstan Respublikasına biriktirilgen wákili B.Sultanov shıǵıp sóylep, jıynalǵanlardı forumnıń ashılıwı menen qutlıqladı.
lajdı ótkeriwden maqset – Prezidentimizdiń 2024-jıl 7-marttaǵı “Hayal-qızlardıń isbilermenligin jolǵa qoyıw hám rawajlandırıwdı qollap-quwatlawǵa baylanıslı qosımsha ilajlar haqqında»ǵı qararınıń orınlanıwın támiyinlew, mámlekettiń ekonomikalıq turmısında hayal-qızlardıń belsendiligin arttırıw, olardıń isbilermenlik baslamaların hár tárepleme qollap-quwatlaw hám «Kishi biznesti úzliksiz qollap-quwatlaw” joybarı sheńberinde olarda isbilermenlik kónlikpelerin qáliplestiriw bolıp esaplanadı.
Forumda «Biznesti rawajlandırıw banki» AKB tárepinen isbilermenlikti baslaw, yamasa onı keńeytiw ushın ajıratılıp atırǵan jeńilletilgen kreditler haqqında maǵlıwmatlar berildi.
– Házirgi kúnge shekem bankimiz tárepinen 18866 isbilermen hayal-qızǵa 920 milliard sumnan aslam kredit ajıratılǵan bolıp, sonıń nátiyjesinde olar ózleriniń biznesin jolǵa qoyıp aldı. Bıyılǵı jılı bankimiz bul baǵdardaǵı jumısların ele de keńeytip, isbilermenlik penen shuǵıllanıwdı qálewshi hám isbilermenlik penen shuǵıllanıp atırǵan hayal-qızlarǵa xızmet kórsetiwdi jáne de rawajlandırıwdı, tartımlı xızmet kórsetiwdi rejelestirgen. Onda Qaraqalpaqstanǵa da ayrıqsha dıqqat qaratılıp, bankimiz tárepinen aymaqlarda kishi biznesti rawajlandırıw orayları arqalı isbilermen hayal-qızlarǵa másláhátler berilmekte. Sonday-aq, olardıń finanslıq bilimin arttırıwǵa járdem kórsetilmekte. Dáramat tabaman degen ónerli hayal-qızǵa imkaniyat kóp. Házirgi waqıtta jergilikli bankler menen birge islesip, máhállelerde de úgit-násiyat jumısların alıp barıwdı da jolǵa qoydıq, Máhállelerdegi «Hayal-qızlar dápteri» hám «Temir dápter»lerde turıwshı hayal-qızlarǵa «Bizneske birinshi qádem» jeńilletilgen kreditlerin usınıp, bizneske qızıqtırıp kishi isbilermenlik yamasa basqa da jumısın baslawına, ózine dáramat deregin jaratıwına járdem kórsetilmekte,-deydi Biznesti rawajlandırıw departamenti direktorınıń orınbasarı D.Umarov.
Ilajda Yaponiyanıń Yamagata universiteti professorları da shıǵıp sóylep, Yaponiya mámleketiniń kishi biznesti rawajlandırıw tájiriybeleri KAIZEN hám LEAN usıllarınan paydalanıp biznesti júrgiziw boyınsha óz tájiriybeleri menen ortaqlastı.
Forum dawamında «Biznesti rawajlandırıw banki» AKB, Yaponiyanıń Yamagata universiteti professorları menen birgelikte islengen U-HOPE oqıtıw programması boyınsha oqıp, onı tabıslı tamamlaǵan 2 áwlad trenerlerine sertifikatlar tapsırıldı.
Ilaj dawamında isbilermenlik tarawında tabıslarǵa erisip kiyatırǵan jas hayal-qızlar da shıǵıp sóylep, ózleriniń tájiriybeleri menen ortaqlastı.

Á.Jiyemuratov,
Qaraqalpaqstan xabar agentligi.
M.Habibullaevtıń túsirgen súwretleri