Prezidentimizdiń baslaması menen Ferǵana wálayatı Bozataw rayonına qáwender sıpatında bekitilip, sol tiykarda aymaqtı sociallıq-ekonomikalıq jaqtan rawajlandırıw boyınsha kóplegen unamlı ilajlar ámelge asırılmaqta. Ásirese,ferǵanalı isbilermenlerdiń bozatawlı kásiplesleriniń is-tájiriybesin arttırıw boyınsha alıp barıp atırǵan jumısları maqtawǵa ılayıq.

Jaqında Bozataw rayonı hákimi B.Úbbiniyazovtıń basshılıǵında bir topar isbilermenler Ferǵana wálayatında ámelge asırılıp atırǵan sociallıq-ekonomikalıq jumıslardıń barısı menen tanısıw hám ózleriniń is-tájiriybesin arttırıw maqsetinde, usı wálayatta boldı.
Delegaciya aǵzaları dáslep Quva rayonında nál jetistiriw menen shuǵıllanıwshı diyqanlar menen ushırasıp, olardıń nál jetistiriw usılları, «Sanoatchilar» MPJ aymaǵında jasawshı puqaralardıń úylerinde qusshılıqtı rawajlandırıw boyınsha ámelge asırılıp atırǵan jumıslar menen tanıstı.
Atap aytqanda, bozatawlı isbilermenler quvalı kásiplesleriniń bódene baǵıw hám onnan qosımsha dáramat tabıw tájiriybelerin úyrendi.
Bunnan soń bozatawlılar usı rayondaǵı Pakana MPJ da shólkemlestirilgen «Bunyodkor» jaslar kishi sanaat zonasında bolıp, bul jerde isbilermenler ushın jaratılǵan imkaniyatlar hám qolaylıqlar menen tanıstı. Atap aytqanda, usı aymaqtaǵı «Blu karbon» JShJ tárepinen quyash panelleri hám kóshe shıraqları hám olardı quwatlandırıwshı batareyalar islep shıǵarıw procesin kózden ótkerdi. Sonday-aq, «Garden Keytering» JShJ XK tárepinen Quvasoy qalasındaǵı mektepke shekemgi bilimlendiriw shólkemlerine tayar azıq-awqat ónimlerin jetkerip beriw jumısları menen jaqınnan tanısıp, olardıń is-tájiriybelerin úyrendi.
Sońınan delegaciya aǵzaları Marǵulan qalası Pichoqchi MPJ da shólkemlestirilgen «Ónermentler orayı»na barıp, bul jerde atlas, adras islep shıǵarıw hám jipek gilemler toqıw sırları haqqında keń túrde maǵlıwmatlarǵa iye boldı.
Sonday-aq, xızmet saparı dawamında Ferǵana qalasında jaylasqan «Auto system glass» kárxanasında mikrozelen jetistiriw usılları, «Beshbola» MPJ aymaǵında jasawshı isbilermen Abdullajon Xolmatov tárepinen zamarıq jetistiriwdi rawajlandırıw baǵdarında ámelge asırılıp atırǵan jumıslar menen jaqınnan tanıstı.
Ferǵana wálayatına saparınıń ekinshi kúninde delegaciya aǵzaları Altıarıq rayonda júzim egiw, onı jetistiriw hám saqlaw usılların úyrenip, ijaraǵa berilgen jer maydanlarında shólkemlestirilgen ıssıxanalar hám ondaǵı jetistirilip atırǵan ónimler boyınsha óz-ara tájiriybe almastı.
Bunnan keyin delegaciya aǵzalarınıń keyingi mánzili Rishton rayonı bolıp, bul jerde gúlalshılıq ónimlerin islep shıǵarıwshı «MM Porcelain» JShJ hám «Mingboshi Ceramic» shańaraqlıq kárxanalarınıń gúlálshılıq ónimlerin islep shıǵarıw boyınsha ámelge asırıp atırǵan jumısları menen jaqınnan tanısıp, ónermentler menen óz-ara pikirlesti.
Álbette, bunday ilajlardıń ótkeriliwi bozatawlı isbilermenlerdiń tájiriybesin arttırıp, olardıń aldaǵı jumıslarına ayqın baǵdar boladı, dep ayta alamız.

Adilbay Orazov,
Qaraqalpaqstan xabar agentligi sholıwshısı