Muhammed al-Xorezmiy atındaǵı TITU Nókis filialında Ózbekstan Respublikası Mámleketlik qáwipsizlik xızmeti Qaraqalpaqstan Respublikası boyınsha basqarması hám “Ózkomnazorat” inspekciyası Qaraqalpaqstan Respublikası aymaqlıq bólimi tárepinen “Informaciya hám kiberqáwipsizlik” atamasında oqıw-seminarı bolıp ótti.
Onda basqarma hám inspekciya xızmetkerleri, filial basshıları hám qánigeleri qatnastı.
Seminar dawamında inspekciya juwapkerleri tárepinen búgingi kúnde jaslar arasında ushırasıp atırǵan kiberjınayatlar, túsinbewshilik yamasa informaciya qáwipsizligi mádeniyatın ańlamaw aqıbetinde kiberjınayat qurbanına aylanıp atırǵan puqaralar, bunday jaǵdaylardıń aldın alıwda nelerge itibar qaratıw áhmiyetli ekenligi sıyaqlı temalarda maǵlıwmatlar berildi. Sonıń ishinde, insanlar tárepinen qastan jaratılıp atırǵan informaciya virusları, basqalardıń atına onlayn kreditler rásmiylestiriliwi jaǵdayları haqqında da hár tárepleme aytıp ótildi.
Atap ótilgenindey, búgingi rawajlanǵan dáwirde informaciya eń úlken baylıq hám sonıń menen birge, eń qáwipli quralǵa aylanıp barmaqta. Sonıń ishinde, kiberhújimler, informaciyadan paydalanıwǵa tiykarlanǵan jınayatlar da kún sayın artıp barmaqta. Áne, usınday jaǵdayda puqaralar arasında informaciyadan durıs paydalanıw hám jeke maǵlıwmatlardıń qáwipsizligin támiyinlewge ayrıqsha itibar qaratıw talap etiledi.
Sonday-aq, ilajda elektron bahalaw sisteması (Hemis) menen baylanıslı kiberjınayatlar hám olarǵa nızamshılıqta belgilengen jazalar haqqında da maǵlıwmatlar berildi.
Ilaj dawamında qatnasıwshılar ózlerin qızıqtırǵan sorawlarǵa juwap aldı.

Qaraqalpaqstan xabar agentligi