Amerikalı fermerler qus grippi sebepli millionlaǵan tawıqlardı joq etiwge májbúr bolmaqta. Aqıbetinde máyek jetkeriw keskin qısqarıp, bahalar kóterildi. NBC xabarına bola, máyek qımbatlaǵanınan soń ayırım tutınıwshılar tawıqlardı ijaraǵa alıwdı basladı.
«Ekew-tórtewden tawıqtı ketegi menen buyırtpashılardıń háwlisine jetkerip berip atırmız. Eki tawıq bir háptede on, tórtewi jigirmaǵa shekem máyek qoyadı»,-dedi Rent the Chicken Homestead shólkeminiń juwapkerlerinen biri Jenn Tompkins. Onıń aytıwınsha, adamlar aqshanı únemlew ushın emes, kóbirek ózlerin qáterjam seziw ushın sonday jol tutpaqta.
Pittsburg jaqınında jaylasqan Rent the Chicken kompaniyasına 2013-jılı tiykar salınǵan bolıp, AQSh hám Kanada boylap fermerler menen birge islesedi, tawıqlardı altı ay múddetke ijaraǵa berip turadı.

Qaraqalpaqstan xabar agentligi