Ayırım sociallıq tarmaq betlerinde usı jıl 4-fevralda Ózbekstanda minimal paydalanıw qárejetleriniń (MPQ) qunı bir ayda adam basına 669 mıń sum etip belgilengeni, usı múnásibet penen hám Konstituciyamızdıń 46-statyası (nızamda belgilengen pensiyalar, napaqalar hám basqa túrdegi sociallıq járdemniń muǵdarları rásmiy túrde belgilengen eń az paydalanıwshı qárejetlerinen az bolıwı múmkin emes) na bola, pensiya, napaqa hám nızam menen belgilengen basqa túrdegi sociallıq járdemlerdiń muǵdarı rásmiy túrde arttırılıwı múmkin ekenligi haqqında xabarlar tarqaldı.

2023-jıl 1-mayda qabıl etilgen Konstituciyanıń jańa redakciyasında belgilep qoyılǵan joqarıdaǵı tártipke muwapıq, pensiya hám napaqalardıń muǵdarı sońǵı ret 2024-jıl 30-aprel kúni PP-sanlı Párman menen MPQ qunına durıs keltirilgen.
Óz gezeginde, 2024-jıl 12-avgusttaǵı Prezidenttiń «Miynet haqı, pensiyalar hám napaqalardıń mudarın arttırıw haqqında»ǵı Pármanı menen pensiya hám napaqalar muǵdarı ótken jıldıń 1-sentyabirinen baslap 15 procentke arttırılǵan hám sonıń ishinde:
– miynet stajı tolıq emes waqqıtaǵı jasqa baylanıslı pensiyanıń eń az muǵdarı qosımsha tólemdi esapqa alǵan halda –ayına 745 000 sum;
– Baǵıwshısın joǵaltqanlıq pensiyasın alıwshılardıń miynetke qábiletsiz shańaraq aǵzası ushın pensiyanıń eń az muǵdarı –ayına 745 000 sum etip belgilengen.
Usıǵan bola, Statistika agentligi belgilegen usı jılı 4-fevraldaǵı minimal paydalanıw qárejetleri qunınıń jańa muǵdarı (669 mıń sum) házirgi waqıttaǵı pensiya hám napaqalar muǵdarınan kóp emes ekenligi sebepli, Konstituciyanıń 46-statyası tártibinde, olardıń arttırılıwına tiykar bolmaydı,-dep málimleme beredi xabar.uz saytı.

Qaraqalpaqstan xabar agentligi