Qaraqalpaqstan Respublikası Ministrler Keńesinde Ózbekstan Respublikası Awıl xojalıǵı ministri Ibrohim Abdurahmonov hám Ministrler Keńesiniń Baslıǵı Farhod Еrmanovlar Rossiya Federaciyasınan kelgen kompaniya wákilleri menen ushırastı.

Ushırasıw dawamında eki tárepleme birge islesiw baylanısların ornatıw, Qaraqalpaqstan Respublikası rayonlarında jańa hám perspektivalı joybarlardı ámelge asırıw, atap aytqanda, Ámiwdárya rayonında kartoshka jetistiriw, miywe jetistiriwge qánigelesken baǵ jaratıw hám olardı qayta islew hám eksportqa baǵdarlaw máseleleri dodalandı.
Sonday-aq, rossiyalı investorlar Shomanay rayonında miywe-palız jetistiriwge qánigelesken klaster shólkemlestiriw hám Taxtakópir rayonında sharwashılıq kompleksin jaratıw boyınsha óz usınıslar bildirdi. Sonıń menen birge, Nókis rayonında zamanagóy qusshılıq kompleksi, Qanlıkól rayonında texnikalıq kannabis ósimligin jetistiriw, Kegeyli rayonında investiciyalıq joybar sheńberinde kartoshka hám boyan ósimliklerin jetistiriw, pyure hám miywe-palız sherbetin islep shıǵarıw joybarları da tanıstırıldı.
Sóylesiw dawamında Farhod Еrmanov kompaniya wákillerine Bozataw hám Taxtakópir rayonlarındaǵı sharwashılıq kompleksleriniń de jumısı menen tanısıwdı usınıs etti.
Óz gezeginde, awıl xojalıǵı ministri Ibrohim Abdurahmonov búgingi kúni awıl xojalıǵında ónim islep shıǵarıw, onı qayta islew hám basqa da tarmaqlardaǵı joybarlardıń perspektivalı bolıwı, hár bir qádem anıq esap-sanaqlarǵa tiykarlanıwı hám aymaqtıń klimat sharayatlarına sáykes alıp barılıwı zárúr ekenligin atap ótti. Ásirese, Qaraqalpaqstan sharayatında investiciyalıq joybarlardı ámelge asırıw hám jańa quwatlıqlardı iske qosıw perspektivalı ekenligine toqtap ótildi. Ushırasıw juwmaǵında rossiyalı investorlar Ózbekstan menen perspektivalı birge islesiw baylanısları ornatılǵanı, jańa joybarlardı ámeliyatqa engiziw birge islesiwdi jáne de bekkemlewge tiykar jaratatuǵınlıǵın atap ótti.

Qaraqalpaqstan xabar agentligi