Еkologiya, qorshaǵan ortalıqtı qorǵaw hám klimat ózgeriwi ministri Aziz Abduhakimov «Gazprombank»tiń birinshi vice-prezidenti Ekaterina Salugina-Sorokova menen ushırasıw ótkerdi.

Sóylesiwler waqtında Ózbekstannıń ekonomikasın suw-klimat krizisine beyimlestiriw hám dúnya ekonomikasınıń jasıl transformaciyasına baǵdarlanǵan joybardıń perspektivaları dodalandı. Baslama 2025-2026-jılları ámelge asırılıwı rejelestirilgen.
Rossiya tárepi Ózbekstannıń ekonomikasın ózgeriwsheń suw hám klimat sharayatlarına orta hám uzaq múddetli beyimlestiriw boyınsha tiykarlı strategiyalardı islep shıǵıwǵa qaratılǵan birgeliktegi ilimiy izertlewlerdi shólkemlestiriwdi usınıs etti. Ámeliy usınıslardıń tayarlanıwı tek ǵana suw hám klimat mashqalaların ekonomikalıq hám siyasiy tallaw boyınsha Ózbekstan ekspert oraylarınıń wákilliklerin kúsheytiw emes, al eki mámleket arasındaǵı ilimiy birge islesiwdi rawajlandırıw jolındaǵı áhmiyetli qádem bolatuǵını atap ótildi.
A.Abduhakimov bul joybar ilimiy-izertlewdegi birge islesiw, sonday-aq, Oraylıq Aziya regionında bilim hám texnologiyalar almasıwı ushın tiykarǵı platformaǵa aylanıwı múmkin ekenligin aytıp ótti. Usı múnásibet penen jumısshı topar dúzip, Oraylıq Aziya qorshaǵan ortalıq hám klimat ózgeriwin úyreniw universitetine («Green University») suw resursların basqarıw tarawındaǵı qánigeler menen óz-ara birge islesiw ushın oqıw saparın shólkemlestiriwge de itibar qaratıldı.
Izertlew nátiyjeleri tiykarında «2050-jılǵa shekem Ózbekstannıń ekonomikasın suw-klimat sharayatları ózgeriwine beyimlestiriw strategiyası» islep shıǵılıwı názerde tutılǵan.
Sóylesiw procesinde 2025-jılı birge islesiwdi keńeytiw, sonıń ishinde, óz-ara paydalı nátiyjelerge erisiw ushın «Qorshaǵan ortalıqtı qorǵaw hám «jasıl» ekonomika jılı» sheńberinde birgeliktegi ilimiy joybarları ámelge asırıw hám turaqlı másláhátlesiwler ótkeriwge kelisildi.

M.Toshqoraeva, ÓzA