Ózbekstan ashıq-aydınlıqtı, sóz hám málimleme erkinligin támiyinlew, sonday-aq, ǵalaba xabar quralların haqıyqıy «tórtinshi hákimiyat»qa aylandırıwdı gózleytuǵın, artqa qaytpas joldı tańlaǵan. Óytkeni adamlardıń sanasında anaw yaki mınaw ideyanıń qáliplesiwinde ǴXQnıń tásiri teńsiz.

Elimizdiń ishki hám sırtqı siyasatı, elimizde ámelge asırılıp atırǵan keń kólemli reformalardı, jámiyetimizde júz berip atırǵan úlken ózgerisler hám jańalanıwlardı operativ sáwlelendirip barıwda basqa basılımlardıń qatarında Ózbekstan Milliy málimleme agentliginiń de múnásip úlesi bar ekenin atap ótiw kerek.
Búgin ÓzA mámlekettiń rásmiy málimleme deregi sıpatında oqıwshılar ushın qolaylı hám qızıqlı tárizde málimleme jetkerip, respublikamızda hám dúnya júzinde júz berip atırǵan waqıya-hádiyselerdi ózbek, orıs, inglis, francuz, nemis, ispan, arab, qazaq hám qıtay tillerinde operativ hám obyektiv túrde sáwlelendirip kelmekte.
Ózbekstan Respublikası Prezidentiniń Pármanına tiykarlanıp 1992-jılı 5-fevral kúni agentlik Ózbekstan Milliy málimleme agentligi (ÓzA) sıpatında qayta dúzilgen.
Mámleketimiz basshısı Shavkat Mirziyoevtiń 2019-jıl 2-dekabrdegi «Ózbekstan Milliy málimleme agentliginiń jumısın bunnan bılay da jetilistiriw ilajları haqqında»ǵı qararına bola, ÓzA respublika turmısına baylanıslı jámiyetlik-siyasiy málimlemelerdi tarqatatuǵın rásmiy málimleme agentligi ekeni atap ótildi hám agentliktiń jumısı jetilistirildi.
Búgingi kúnde dúnyanıń jigirmaǵa shamalas málimleme agentligi hám jetekshi basılımları menen baylanıs ornatqan ÓzA Túrkiy mámleketler málimleme agentlikleri alyansı (ATNA), Ǵárezsiz Mámleketlerdiń Doslıq Awqamı mámleketlik málimleme agentlikleri keńesi (Informsovet) hám Islam birge islesiw shólkemi Málimleme agentlikleri associaciyası (UNA)nıń belsendi aǵzası esaplanadı.
Ótken jıldıń úshinshi shereginde ǴMDA jámiyetlik media hám ǵalaba xabar quralların monitoring etiw hám talqılaw boyınsha jetekshi «Brand Analytics» izertlew orayınıń talqılawına bola, ÓzAnıń veb-saytı respublikamızda eń kóp silteme jasap atırǵan basılımlardıń kúshli úshliginen orın alǵan.
Xuan Manuel Fonruj, Argentinanıń Latın Amerikası málimleme agentligi (LANA) Bas direktorı:
– Búgingi globallasıw dáwiri media strukturalarınıń aldına dúnyanıń jetekshi málimleme agentlikleri menen birge islesiwdi bunnan bılay da rawajlandırıw, turaqlı málimleme almasıwdı jolǵa qoyıw, dúnyada júz berip atırǵan waqıyalar haqqında xalıqtı qalıs, haqıyqıy málimleme menen operativ támiyinlew zárúrligin qoymaqta.
Ózbekstan tereń oylanǵan, óz-ara paydalı hám ámeliy ruwxtaǵı sırtqı siyasatı nátiyjesinde keyingi jılları sırt eller menen doslıq qatnasıqtı jedel rawajlandırmaqta. Házirgi processte biz de ÓzA menen tıǵız birge islesip, málimleme almasıw tarawında memorandumǵa qol qoyǵanbız. Atap ótiwim kerek, bul biz ushın Oraylıq Aziya regionı menen sheriklik jolındaǵı áhmiyetli qádem boldı. ÓzAnıń ispan tilinde shıǵatuǵın maqalaların baqlap baraman. Bul materiallar arqalı agentlik Ózbekstannıń jańalıqların isenimli derek sıpatında ispan tilles dúnya jámiyetshiligine tarqatpaqta.
ÓzA betleri oqıwshılarımızdı tek ǵana Ózbekstan emes, al pútkil Oraylıq Aziya regionı menen baylanıslı waqıya-hádiyselerden xabardar etip baradı.
Pursattan paydalanıp, óziniń dańqlı ótmishine iye Ózbekstan Milliy málimleme agentliginiń dóretiwshilik jámáátin búgingi bayramı menen shın júrekten qutlıqlayman.
Raza Said, Ullı Britaniyanıń «The London Post» málimleme basılımınıń redaktorı:
– 1992-jıl 5-fevral Ózbekstan ǵalaba xabar quralları hám jurnalistika tariyxında áhmiyetli sáne ¬ – Ózbekstan Milliy málimleme agentligi – ÓzA dúzilgen kún.
Áne, usı bayram múnásibeti menen ÓzAnıń pidayı jámáátine jámiyettiń rawajlanıwına qosıp atırǵan úlken úlesi ushın minnetdarshılıq bildiremen. ÓzA otız jıldan aslam waqıttan berli media maydanında ádillik shıraǵı, haqıyqat ústini bolıp kelmekte.

ÓzA dóretiwshilik jámáátiniń mashaqatlı miyneti, professionallıǵı sebepli, jurnalistika normaların qollap-quwatlaǵan halda isenimli málimleme deregine aylanǵanın aytıp ótiw kerek. Bunday háreket shınında da maqtawǵa ılayıq.
Haqıyqatlıq jolındaǵı pidayılıq, umtılıs ushın raxmet. Jurnalistika tarawında jetiklikke umtılıw hám kásipke bolǵan bunday sadıqlıqtı qádirleymen. Agentlik jámáátine tabıslar tileymen.
Irina Akulovich, Belarustıń «BelTA» telegraf agentliginiń Bas direktorı:
– Ózbekstan Milliy málimleme agentligi jámáátin agentlik dúzilgen kún menen shın júrekten qutlıqlayman. ÓzAda ayqın, umıtılmas waqıyalarǵa tolı 33 jıllıq tariyx jámlesken.
Búgin ÓzA mámlektte hám sırt elde júz berip atırǵan hádiyseler haqqında operativ, tolıq maǵlıwmat berip baratuǵın isenimli derek esaplanadı. Jetiskenliktiń sırı bolsa hár qashan waqıyalardıń rawajlanıwın baqlap turatuǵın dóretiwshi professionallar jámáátinde bolıp tabıladı. Obyektivlik hám tájiriybe – agentlik xızmetkerleri jumısınıń ózine tán ózgesheligi.
ÓzA uzaq jıllar jámiyetke haqıyqatında da paydası tiyetuǵın, salamat málimleme mákanında girewli ornı bar Agentlik bolıp qala beredi.
Jámáátte jumıs alıp barıp atırǵan barlıq jurnalistlerge densawlıq, bálent dóretiwshilik párwaz hám áwmet tilep qalaman.
Tierno Ahmadu Si, Senegal málimleme agentligi (APS) Bas direktorı:
– Búgingi málimleme ásirinde eń qımbat derek – qalıs hám obyektiv xabar, desem jańılıspayman.
Keyingi jıllarda Ózbekstanda milliy, tariyxıy hám diniy qádriyatlar tikleniwi menen birge ǴXQnıń ornı, dóretiwshiniń qádir-qımbatı da artqanın baqlawımız múmkin.
Ásirese, elińizde dúnyada júz berip atırǵan waqıyalardan xabardar bolıw, shet tillerin jaqsı biletuǵın, kompyuter texnologiyaları menen qurallanǵan jurnalistlerdiń jańa áwladı qáliplesip atırǵanı jáne de quwanıshlı.
Mámleketińizde reformalar procesi haqqında 9 tilde málimleme tarqatıp atırǵan ÓzA Prezident Shavkat Mirziyoevtiń Ózbekstan ǴXQnı dúnyanıń kózge kóringen media minberi qatarına qosıwına qaratılǵan baslamalarınan kelip shıǵıp, xalıqaralıq baylanıslardı keńeytiwge umtılıp atırǵanınan xabardarmız.
Itibarlı tárepi, ÓzA eń sońǵı jańalıqlar hám jámiyetlik-siyasiy málimlemeler tarqatatuǵın rásmiy agentlik sıpatında jasalma intellekt tiykarında arnawlı robot-xabarshınıń jumısın jolǵa qoyǵan. Bul da zamanagóy málimleme tarqatıw tendenciyasınıń bir jetiskenligi.
Pursattan paydalanıp, jámáátińizdi Ózbekstan Milliy málimleme agentligi dúzilgeniniń 33 jıllıǵı menen shın kewilden qutlıqlayman. Pidayı hám miynetkesh kásipleslerime jurnalistikanıń mashaqatlı jolında bálent párwazlar tileymen. Qálemińiz bárqulla ótkir bolsın
Mederbek Shermetaliev, Qırǵız Respublikasınıń «Kabar» Milliy málimleme agentliginiń direktorı:
– Ózbekstan Milliy málimleme agentligi – ÓzAnıń tatıw jámáátin áhmiyetli sáne menen shın júrekten qutlıqlayman!
Ózbekstan hám Qırǵızstan arasındaǵı qatnasıqlar uzaq tariyxqa iye bolıp, xalıqlarımızdıń doslıǵı ásirlerge barıp tireledi.
Dos eki úlkeniń tiykarǵı málimleme agentlikleri bolǵan «Kabar» hám ÓzA kóp jıllardan berli jedel málimleme almasıp, nátiyjeli birge islesip kelmekte. Jáámáátlerimiz bunnan keyin de ellerimizdiń abadanlıǵı jolındaǵı birge islesiwdi bekkemlewge múnásip úles qosadı, dep isenemen.
Búgingi tariyxıy kún múnásibeti menen ÓzA basshılıǵı hám dóretiwshilik jámáátine sheksiz ilham-yosh, jańadan-jańa tabıslar hám salmaqlı jetiskenlikler tileymen!

ÓzA