Malayziyanıń Penang shtatında «Ózbekstan – Ullı Jipek jolı dúrdanası» Ózbekstan – malayziya turizm forumı bolıp ótti.
Forumda Ózbekstannıń turizm imkaniyatları, tariyxıy estelikleri, mádeniy hám tábiyǵıy baylıqları haqqında prezentaciyalar ótkerildi. Onda Ózbekstannıń turizm baǵdarları, sonıń ishinde, Shaxrisabz, Samarqand, Buxara, Xiywa hám basqa qalalarınıń bay mádeniy hám tariyxıy áhmiyetine ayrıqsha itibar qaratıldı.
Eki mámlekettiń 100den aslam turizm biznesi wákiliniń qatnasıwında ótkerilgen «B2B» ushırasıwları sheńberinde Ózbekstan hám Malayziya turistlik kompaniyaları arasında isbilermenlik qatnasıqları ornatıldı. Birge islesiw imkaniyatları dodalandı hám turistlerdiń aǵımın arttırıw boyınsha óz-ara kelisimlerge erisildi.
Sonday-aq, Malayziya turistlik kompaniyalarınıń wákilleri forum sheńberinde shólkemlestirilgen «Jańa Ózbekstan» fotokórgizbesi arqalı sońǵı jıllarda Ózbekstanda qurılǵan jańa turizm orayları, infrastrukturalar hám mádeniy miyras obyektleri menen tanıstı.
Ilajǵa kelgen miymanlar elimizdiń bay hám ráńbe reń mádeniyatı hám dástúrlerin kórsetetuǵın milliy nama-qosıqlar hám ayaq oyını menen jaqınnan tanısıp, ózbek milliy taǵamlarınan tatıp kórdi.
Forum Ózbekstan hám Malayziya arasındaǵı turizm qatnasıqların rawajlandırıw, óz-ara paydalı birge islesiw ushın jańa imkaniyatlar ashıw jolında áhmiyetli qádem boldı.

Muhayyo TOShQOROEVA,
ÓzA