Qaraqalpaqstan Respublikasında 2024-jıldıӊ 1-yanvar-dekabr jaǵdayına isbilermenlik subyektleri haqqındaǵı statistikalıq maǵlıwmatlarǵa qaraǵanda (diyqan hám fermer xojalıqlarısız) 3254 kárxana hám shólkem tazadan ashılǵan.

Olardıń 3102 i kishi biznes subyektleri sıpatında esapqa alınǵan. Múlkshilik túri boyınsha basım kópshiligi, yaǵnıy 2647 i juwapkershiligi sheklengen jámiyet, 314 ti shaӊaraqlıq kárxana, 93 i jeke kárxana, 331 i óndirislik kooperativler bolıp dizimnen ótken.
– Isbilermenlikti rawajlandırıw mámleketimiz ekonomikasınıӊ rawajlanıwında, jaӊa jumıs orınlarınıӊ jaratılıwı hám xalıqtı jumıs penen bánt etiwde úlken áxmiyetke iye. Soӊǵı jıllarda mámleketimiz Prezidenti tárepinen isbilermenlerge qaratılıp atırǵan itibar nátiyjesinde isbilermenlik subyektleri óz aldına qoyǵan maqsetlerine erkin, qıyınshılıqsız erisip kelmekte. Sebebi isbilermenlik subyektlerin qollap-quwatlaw hám olarǵa járdem beriw boyınsha húkimetimiz tárepinen bir qansha jeӊillikler jaratılıp, tiyisli qararlar qabıl etildi,-deydi Qaraqalpaqstan Respublikası Statistika basqarması statistikalıq registrlerdi júrgiziw bóliminiń baslıǵı Bisenbay Daribaev.
Respublikamızda ótken dáwirde 32 mıń 810 kárxana dizimge alınıp, sonnan 21 mıń kárxana hárekettegi kárxana bolıp esaplanadı. Bul kórsetkish ótken jıldıń usı dáwirine salıstırǵanda 80,9 procentti quradı.
Hárekettegi kárxanalardıӊ ekonomikamızda qaysı tarawlarında úles qosıp atırǵanın aytıp ótetuǵın bolsaq, sawda tarawında 6339, awıl, toǵay hám balıqshılıq xojalıǵında 2343, sanaat tarawında 2446, qurılıs tarawında 1449, turmıslıq hám awqatlanıw boyınsha xızmetler tarawlarında 1163, tasıw hám saqlaw tarawında 791, málimleme hám baylanıs tarawlarında 414, densawlıqtı saqlaw hám sociallıq xızmetler kórsetiwde 481, basqa xızmet túrlerinde 5575 kárxana jumıs islep turıptı.
2025-jıldıń 1-yanvar jaǵdayına hárekettegi sırt el kapitalınıń qatnasıwındaǵı kárxanalardıń sanı 155 ti quraydı. Olar Qıtay Xalıq Respublikası, Rossiya Federaciyası, Qazaqstan Respublikası, Qubla Koreya Respublikası hám basqa da mámleketlerdiń qatnasıwındaǵı sırt el investor kárxanaları bolıp esaplanadı.
2024-jıl yanvar-dekabr ayına sırt el kapitalınıń qatnasıwındaǵı 48 kárxana jańadan ashılǵan bolıp, ótken jıldıń usı dáwirine salıstırǵanda 18 kárxanaǵa kóbeygenligin kóriwimizge boladı.

Á.Jiyemuratov,
Qaraqalpaqstan xabar agentligi.