Mámleketimizde hayal-qızlardıń huqıqların qorǵaw, olardıń jámiyette óz ornın tabıwı hám gender teńlik máseleleri boyınsha keń kólemli jumıslar alıp barılmaqta. Hayal-qızlardıń erler menen teń huqıqlı bolıp, elimizde tarawlardıń rawajlanıwına úles qosıp atırǵanlıǵı hár bir iste ayqın kózge taslanbaqta. Ásirese, ilimniń awır júgin tartıp kiyatırǵan hayal-qızlardıń miynetleri hár qanday maqtawǵa ılayıqlı bolıp, olardıń erisken tabısları jaslarǵa órnek bolsa arzıydı.

Qaraqalpaqstan medicina institutında 11-fevral –Xalıqaralıq ilim tarawındaǵı hayal-qızlar kúni múnásibeti menen ushırasıw shólkemlestirildi. Ilajda institut rektorınıń hayal-qızlar máseleleri boyınsha másláhátshisi Z.Erimbetova Ózbekstan Qaharmanı O.Saytova, medicina ilimleriniń doktorı (DSc) A.Ermekbaeva hám medicina ilimleriniń kandidatları S.Bazarova hám F.Xojambergenovalar studentlerge ilim jolındaǵı tájiriybeleri menen ortaqlastı.
Ushırasıwda O.Saytova óziniń miynet jolı, ilim tarawında erisken jetiskenlikleri hám qolǵa kirgizgen tabısları haqqında keń túrde aytıp berdi. Student jaslarǵa Prezidentimiz tárepinen jaratılıp berilip atırǵan imkaniyatlardan únemli paydalanıp, keleshekte óz kásibine sadıq jetik kadrlar bolıp jetilisiwine shaqırdı.
Ilaj dawamında student qızlar ózleriniń qızıqtırǵan sorawlarına ustazlarınan tiyisli juwap aldı.

Qaraqalpaqstan xabar agentligi