Házirgi kúnleri Jizzaq wálayatında shaxmat boyınsha jas óspirimler arasında Ózbekstan chempionatı bolıp ótpekte.

Chempionatqa elimizdiń barlıq aymaqlarınan 400 den aslam shaxmatshılar qatnasıp, olar 8-10-12 jas kategoriyasında shaxmattıń standart, rapid hám blic túrleri boyınsha óz-ara bellespekte.
Atap aytqanda, 8 jastaǵı qızlar arasında ótkerilgen bellesiwlerde Taqıyatas rayonı sport mektebiniń shaxmat boyınsha tárbiyalanıwshısı Zarina Larina barlıq qarsılasların jeńip shıǵıp, 8-turdan soń múddetinen aldın Ózbekstan chempionı ataǵına miyasar boldı hám jáhán chempionatına jollamanı qolǵa kirgizdi.
-Shákirtim Zarina Larinanı shaxmattıń standart túri boyınsha jarısqa tayarladım hám onda barlıq qarsılasların jeńip shıǵıwǵa eristi,-deydi tájiriybeli trener Abdikarim Turaev.-Men shákirtimniń erisken tabısınan oǵada quwanıshlıman. Sonday-aq, Zarina chempionatta rapid hám blic túri boyınsha da bellesiwlerge qatnasıp, rapid boyınsha 3-orındı iyelewge miyasar boldı. Házirgi waqıtta ol blic túri boyınsha bellesiwlerde jarıslarǵa qatnasıp atır. Bul jarısta jeńimpaz boladı, dep oylayman.
Házirgi waqıtları bellesiwler dawam etpekte.

Adilbay Orazov,
Qaraqalpaqstan xabar agentligi sholıwshısı