Ózbekstan Respublikası Prezidenti Shavkat Mirziyoev Malayziya Bas ministri Anvar Ibrahimniń mirát etiwine bola 4-5-fevral kúnleri rásmiy sapar menen usı elde boladı.

Sapar etiw sheńberinde Kuala-Lumpur qalasında Bas ministr Anvar Ibrahim menen eki tárepleme sóylesiwler, Malayziyanıń jetekshi kompaniyalarınıń basshıları menen ushırasıwlar, birgeliktegi biznes forum hám basqa da ilajlar názerde tutılǵan.
Bolajaq joqarı dárejedegi sóylesiwlerdiń kún tártibinen Ózbekstan-Malayziya doslıq qatnasıqların bunnan bılay da rawajlanıdırıw hám ámeliy birge islesiwdi, sonıń ishinde, sawda, investiciyalar, innovaciyalar, texnologiyalıq kooperaciya, neft-ximiya, elektronika, «jasıl» energetika, «aqıllı» awıl xojalıǵı, turizm hám basqa da kóplegen áhmiyetli baǵdarlardı keńeytiw máseleleri orın alǵan. Mádeniy-gumanitarlıq almasıwlardı jedellestiriwge ayrıqsha itibar qaratıladı.
Jetekshiler xalıqaralıq siyasat hám regionallıq birge islesiwdiń áhmiyetli baǵdarların da kórip shıǵadı.
Sammit juwmaǵında eki mámleket arasındaǵı keń kólemli sheriklikti bunnan bılay da rawajlandırıwǵa qaratılǵan Birliktegi bildiriw hám salmaqlı kelisimler toplamı qabıl etiliwi rejelestirilgen.
Sapar aldınan Malayziyada bir qatar áhmiyetli ilajlar ótkerilip atırǵanın atap ótiw kerek.
Atap aytqanda, jetekshi tallaw orayları hám izertlew strukturalarınıń ushırasıwı bolıp ótti. Jaqın kúnlerde Ózbekstannıń turizm potencialı hám mádeniy miyrası prezentaciyaları, eki mámlekettiń jetekshi joqarı bilimlendiriw mákemelerniń rektorlarınıń forumı hám basqa da ilajlar ótkeriledi.

ÓzA