Qaraqalpaqstan nasos stanciyaları hám energetika basqarmasınıń juwapkerleri Xojeli rayonında jaylasqan “Toǵay xojalıǵı 3” nasos stanciyasındaǵı elektr energiyasınan nátiyjeli paydalanıw, agregatlardı ońlaw hám nál egiwge jerlerdi tayarlaw jumısların úyrendi,-dep xabar bermekte Suw xojalıǵı ministrliginiń baspasóz xızmeti.

Ilajda basqarmanıń óndiris texnika bóliminiń baslıǵı S.Utemuratov energiya resurslarınan paydalanıwdıń nátiyjeliligin arttırıw boyınsha belgilengen wazıypalar, zamanagóy energiya únemlewshi qurılmalardı ornatıw hám nasos stanciyaları agregatların sapalı ońlaw boyınsha tapsırmalar berdi.
Sonday-aq, nasos stanciyası átirapındaǵı maydanlardı egiwge tayarlaw, járdemshi xojalıqlardı shólkemlestiriw jumısları úyrenildi.
– Nasos stanciyalarınıń átirapındaǵı 2 sotixlı egislik maydanda awıl xojalıǵı ónimleri jetistiriledi,-deydi Xojeli bóliminiń baslıǵı S.Qujanov. – Bul nárse usı jerde jumıs isleytuǵın xızmetkerlerdiń jaz máwsimindegi kúnlik azıq-awqatların qosımsha támiyinlewge xızmet etip atır. Xızmetkerlerimizdiń sharayatların jaqsılaw, qosımsha xoshametlew boyınsha barlıq nasos stanciyalardıń qorǵaw zonalarındaǵı jer maydanlarınan nátiyjeli paydalanıw boyınsha berilgen tapsırmalardıń orınlanıwın támiyinleymiz, álbette.
Juwapkerler tárepinen nasos stanciyası átirapında islengen járdemshi xojalıqlarda alıp barılǵan jumıslar dodalanıp, pikir-usınıslar bildirilip, tiyisli tapsırmalar berildi.

Qaraqalpaqstan xabar agentligi