NMPI tayanısh doktorantı Aybolǵan Borasheva Prezident mámleketlik stipendiyasınıń jeńimpazı boldı,-dep xabar bermekte NMPI baspasóz xatkeri I.Mátekov.

2025-jıl ushın Ózbekstan Respublikası Prezidenti Mámleketlik stipendiyasına tayanısh doktoranturada oqıp atırǵan doktorantlar arasında ótkerilgen tańlawda Ájiniyaz atındaǵı Nókis mámleketlik pedagogikalıq institutı 13.00.02 – Tálim hám tárbiya teoriyası hám metodikası (inglis tili) qánigeliginiń 3-kurs tayanısh doktorantı Aybolǵan Borasheva social-gumanitar pánler baǵdarı boyınsha jeńimpaz boldı.
Ulıwma 5 baǵdar boyınsha ótkerilgen tańlawǵa 72 talaban hújjet tapsırǵan bolsa, arnawlı komissiya tárepinen olardıń arasınan 10 doktorant, jeńimpaz dep tabıldı.
Maǵlıwmat ornında atap ótiw kerek, tayanısh doktorant A.Borasheva házirgi waqıtta «Elevating Willingness to Communicate via Flipped Classroom of ESP learners» («Arnawlı maqsetler ushın inglis tilin úyrenetuǵın studentler arasında Flipped Classroom arqalı sáwbetlesiwge tayarlıǵın arttırıw») temasında ilimiy-izertlew jumısların alıp barmaqta. Ol usı ilimiy teması boyınsha búgingi kúnge shekem sırt ellerdiń abıraylı ilimiy jurnallarında 3 maqala, Joqarı attestaciyalıq komissiyası quramındaǵı ilimiy jurnallarda 8 maqala, xalıqaralıq hám respublikalıq konferenciyalarda 19 tezis járiyalaǵan hám 1 sabaqlıǵı baspadan shıqqan.

Qaraqalpaqstan xabar agentligi.