Ózbekstan Respublikası Prezidenti janındaǵı Sociallıq qorǵaw milliy agentligi direktorı Mansurbek Ollayorov xalıqtı sociallıq qorǵaw tarawında islenip atırǵan jumıslar menen tanısıw maqsetinde, xızmet saparı menen respublikamızǵa keldi.

Agentlik direktorı eń dáslep Nókis qalasında jaylasqan 10-sanlı «Nurlı máskan» qánigelestirilgen mektep-internatında bolıp, Prezidentimiz qararı tiykarında 6 mlrd 966 mln sumlıq kapital rekonstrukciya jumısları júrgizilgen qosımsha oqıw imaratınıń ashılıw máresimine qatnastı hám mektep jámáátine óziniń eń jaqsı tileklerin bildirdi.
Ilajda agentlik direktorı M.Olloyorov, Qaraqalpaqstan Respublikası Ministrler Keńesi Baslıǵınıń orınbasarı B. Utemuratov penen birge, oqıw dárgayında oqıwshılar ushın jaratılǵan sharayatlar menen tanısıp, mektep-internatında oqıp atırǵan oqıwshılar hám olarǵa tálim berip atırǵan pedagog-tárbiyashılar, «Jolshılar» mákan puqaralar jıyınınıń máhálle jetiligi menen jaqınnan sáwbetlesti.
Maǵlıwmat ushın aytatuǵın bolsaq, búgingi kúni bul mektep-internatında 251 oqıwshı zaman talabına say tálim-tárbiya almaqta hám Prezidentimizdiń arnawlı qararı tiykarında mektepke qosımsha oqıw imaratı hám sport zalı jańadan qurıp berildi.
Bunnan soń Ózbekstan Respublikası Prezidenti janındaǵı Sociallıq qorǵaw milliy agentligi direktorı Mansurbek Ollayorov sociallıq qorǵaw baǵdarında islenip atırǵan jumıslar menen tanısıw maqsetinde, Shımbay rayonına bardı.
Sapar dawamında ol respublikamızdaǵı taraw basshıları hám rayondaǵı juwapker xızmetkerler menen birgelikte, mayıplıǵı bolǵan erler ushın arnalǵan «Múriwbet úyi» jumısı menen tanısıp, qánigelerdiń pikir-usınısların tıńladı.
Sonday-aq, sapar dawamında Mansurbek Olloyorov usı rayondaǵı «Kámbaǵallıqtan abadanlıqqa qaray» baǵdarlaması tiykarında Gúlistan hám Temir jol gúzarı mákan puqaralar jıyınında ámelge asırılıp atırǵan jumıslar menen tanısıp, aymaq turǵınlarınıń mashqalaların hám usınısların tıńladı. Usı aymaqtaǵı sociallıq xızmetkerler Aliya Qarmanbaeva hám Jetker Jabbarbergenov penen sáwbetlesip, olardıń jumısı menen tanıstı.
Sonıń menen birge, agentlik direktorı M.Ollayorov usı rayondaǵı 43-sanlı ulıwma bilim beriw mektebinde shólkemlestirilgen korrekcion hám inklyuziv klasslardıń jumısı menen tanısıp, bul jerde tálim alıp atırǵan oqıwshılardıń ata-analar menen sáwbetlesti.
Bunnan soń rayondaǵı mámleketlik-jeke menshik sheriklik tiykarında kúndizgi kútim xızmetin shólkemlestiriw niyetinde bolǵan isbilermen menen ushırasıp, bul jerde balalar ushın jaratılǵan sharayatlardı kózden ótkerdi hám óz usınısların ayttı.
Ilajǵa Qaraqalpaqstan Respublikası Ministrler Keńesiiniń Baslıǵı F.Еrmanov qatnastı.

Adilbay Orazov,
Qaraqalpaqstan xabar agentligi sholıwshısı