Aldın xabar bergenimizdey, Tashkent qalasında ótkerilgen boks boyınsha Ózbekstan chempionatında qaraqalpaqstanlı boksshiler úlken tabıslardı qolǵa kirgizdi.

Atap aytqanda -60kg salmaqta qatnasqan jerlesimiz Madiyar Daniyarov Ózbekstan chempionı ataǵın jeńip alǵan bolsa, hayal-qızlar arasında -60 kg salmaqta Rashida Tagirova hám -66 kg da Aysánem Sárwarovalar gúmis medal, – 63 kg da Mohira Axmedova, + 81 kg da Zarafshan Xojambergenovalar qola medalın jeńip alǵan edi.
30-yanvar kúni usı jeńimpaz sportshılarımız hám olardıń trenerleri Nókis qalasında sport ministrligi basshıları hám keń jámiyetshilik wákilleri tárepinen kútip alındı.
Máresimde Qaraqalpaqstan Respublikası sport ministri Adilbek Allanazarov hám basqalar elimizde Prezidentimizdiń basshılıǵında sporttı rawajlandırıw boyınsha alıp barılıp atırǵan reformalar nátiyjesinde, mámleketimiz sportshıları Aziya, jáhán hám Olimpiada chempionlarında joqarı nátiyjelerdi qolǵa kirgizip kiyatırǵanın úlken qanaatlanıwshılıq penen atap ótti. Ásirese, ózbekstanlı boksshilerdiń jetiskenliklerin búgingi kúni dúnya jámiyetshiligi tán alıp atırǵanın, sonıń ishinde Ózbekstan chempionatında jeńimpaz bolıw oǵada qıyın ekenligine toqtalıp, respublikamız boksshileriniń erisken tabısı menen qızǵın qulıqladı hám olardıń bunnan da úlken jeńislerdi qolǵa kirgiziwine tilekleslik bildirdi.

Adilbay Orazov,
Qaraqalpaqstan xabar agentligi sholıwshısı