«Ózbekneftgaz» AJ tárepinen ámelge asırılǵan «E-KON» joybarı «Global CIO» xalıqaralıq professional IT jámiyetshiligi tárepinen janılǵı-energetika tarawındaǵı «Jıldıń eń jaqsı joybarı» dep járiyalandı.

Bul sıylıq Ózbekstannıń sanlı transformaciya tarawında erisken jetiskenliklerinen biri sıpatında atap ótilip, mámlekettiń xalıqaralıq maydandaǵı abırayın jáne de bekkemledi.
«E-KON» joybarı «Sanlı Ózbekstan-2030» strategiyası sheńberinde ámelge asırılıp atırǵan áhmiyetli reformalardan biri esaplanadı. Bul baslama «Ózbekneftgaz» AJ qaramaǵındaǵı kánlerdi sanlastırıw arqalı nátiyjelilikti arttırıwǵa qaratılǵan.
Joybar sheńberinde 80 nen aslam gazdi tayarlaw qurılması qurılıp, paydalanıwǵa tapsırıldı. Bul bolsa kánlerde qazıp alınıp atırǵan gazdi real waqıt rejiminde onlayn qadaǵalaw hám zárúr bolǵanda ayrıqsha ilajlar kóriw imkaniyatın jarattı.
«Global CIO» xalıqaralıq tańlawı dúnyanıń eń aldınǵı IT joybarların anıqlaw hám olardı keń jámiyetshilikke tanıstırıw maqsetinde hár jılı ótkeriledi. 2024-jılı tańlawǵa 30 dan aslam mámleketten 129 joybar usınıs etilgen. Jeńimpazlar arasında Ózbekstan, Qıtay, Braziliya, Hindstan, Pakistan, Qazaqstan, Qırǵızstan, Belarus, Malayziya, Túrkiya hám AQSh kompaniyaları da bar.
Sonday-aq, «Ózbekneftgaz» AJ málimleme-kommunikaciya texnologiyaları departamentiniń baslıǵı Inyom Norqulov «Global CIO» xalıqaralıq professional IT jámiyetshiligi tárepinen dúnyanıń eń belsendi IT-liderleri qatarına kirgizildi.

N.Ziyodullaeva, ÓzA