Xalıq xojalıǵınıń barlıq tarawlarında bolǵanı sıyaqlı, gaz támiynatı tarawında da zamanagóy sanlı texnologiyalar óziniń unamlı nátiyjesin bermekte. Atap aytqanda, elimiz aymaqlarında «Avtomatlastırılǵan máhállelerde tutınıw qadaǵalaw balansı» joybarı turmısqa engizilip, bunnan bılay respublikamızdıń qala hám rayonlarındaǵı máhállelerde usı «Avtomatlastırılǵan máhálle tutınıw qadaǵalaw balansı» joybarı tiykarında jumıslar alıp barıw belgilep alınǵan.

Házirgi waqıtta Tashkent wálayatınıń Parkent rayonı Ǵulom mákan puqaralar jıyını, soń Xorezm wálayatınıń Shavat rayonındaǵı bir qatar máhállelerde jolǵa qoyılıp, usı tájiriybe názerde tutılǵan nátiyjelerge erisilgen edi.
«Parkent tájiriybesi» tiykarında ámelge asırılǵan jumıslar menen jaqınnan tanısıw hám tájiriybe almasıw maqsetinde, «Xududgaz Qarakalpaqstan» gaz támiynatı filialınıń tiyisli juwapker qánigeleri, qalalıq hám rayonlıq gaz támiynatı bólimleriniń bas injenerleri hám eksplautaciya ustalarınan dúzilgen topar Xorezm wálayatınıń Shavat rayonına barıp, ol jerde shólkemlestirilgen tájiriybe almasıw, ámeliy oqıw-seminarına qatnastı.
Seminarda «Xududgaztayminot» akcionerlik jámiyeti qánigeleri tárepinen aymaq belsendileri, máhálle jetiligi, rayon hákimligi, prokuratura, ishki isler, gaz támiynatı qánigelerine joybardıń maqseti hám onıń juwmaǵında kútilip atırǵan nátiyjeleri ayrıqsha atap ótildi. Sonday-aq, tutınıwshılarǵa jetkerilip berilip atırǵan tábiygıy gaz támiynatın bir jerden elektron tártipte jáne avtomatlastırılǵan basqarıw sistemasında alıp barıw túsindirildi.
-Bul avtomatlastırılǵan máhálle tutınıw qadaǵalawı balansı sistemasınıń iske túsiriliwiniń tiykarǵı maqseti, jıllıq gaz shıǵınlarınıń aldın alıw qalaberdi tutınıwshılarǵa jetkerip beriletugın tábiyǵıy gaz támiynatın jáne de jaqsılawdan ibarat,-deydi «Xududgaz Qarakalpaqstan» gaz támiynatı filialınıń bólim baslıǵı Ruslan Ǵarrıbaev. –Seminarda qánigelerimiz ózleri ushın kerekli is-tájiriybesin úyrenip, paydalı maǵlıwmatlarǵa iye boldı.
Ilaj dawamında qaraqalpaqstanlı qánigeler seminar shólkemlestiriwshilerine sorawlar berip, olarǵa juwaplar aldı.

Adilbay Orazov,
Qaraqalpaqstan xabar agentligi sholıwshısı