«Dúnyada bir hayal bolsa da, zergerge jumıs tabıladı», degen gáp durıs, álbette. Endi hayal-qızlardıń deydindegisin, olardıń ózinen basqa kim jaqsı bile aladı. Álbette – hayal adam bunı jaqsı túsinedi.
Nókis qalasındaǵı Qutlı qonıs mákan puqaralar jıyınında jumıs alıp barıwshı ónerment-zerger qız Bibi-Maryam Mırzambetova áne usınday qaraqalpaq hayal-qızlarınıń milliy taǵınshaqların hám bezew buyımların tayarlaw menen shuǵıllanbaqta.
Sonday-aq, biser toqıw sıyaqlı qol óneri menen de shuǵıllanadı. Óziniń biytákirar qol miynetinen dóregen názik hám milliy zergerlik buyımları arqalı jergilikli qız-kelinsheklerdiń kewil talǵamınan orın alıp, óziniń turaqlı qarıydarların tawıp kelmekte.
― Zergerlik tarawında óz jumısımdı 2021-jıldan basladım. Qol miynetim arqalı tayarlaǵan ónimler menen respublikamızda shólkemlestirilgen bir qatar kórgizbe-yarmarkalarına belsene qatnasıp kiyatırman,-deydi ónerment B.Mırzambetova.
Aldaǵı waqıtta ózimniń jeke brendime tiykar salıp, bul baǵdarda jumıslarımdı ele de rawajlandırıw niyetim bar. Sawda-sanaat palatası menen de birge islesip, jumıslarımdı jetilistiriw niyetindemen.
Ónermenttiń qolınan dóregen zergerlik buyımların kóriń hám baha beriń.
Qaraqalpaqstan xabar agentligi