«Qorshaǵan ortalıqtı qorǵaw hám «jasıl» ekonomika jılı» respublikamızda jaqsı jańalıqlar, tarawlarda jańa baslamalar menen baslanbaqta. Orınlarda alıp barılıp atırǵan keń kólemli jumıslardıń tiykarǵı baǵdarı xalıqtıń jaqsı jasawı ushın qolaylıqlar jaratıwǵa qaratılǵan.

Jaqında Qaraqalpaqstan Respublikası Joqarǵı Keńesiniń Baslıǵı Amanbay Orınbaev Taqıyatas rayonın rawajlandırıw hám keń kólemli abadanlastırıw jumısların alıp barıw boyınsha májilis ótkergen edi. Majiliste kámbaǵallıqtı qısqartıw, puqaralardıń turmısında ushırasıp atırǵan mashqalalardı sheshiw, sonıń menen birge, máhállelerdiń infrastrukturasın jaqsılaw hám basqa da bir qatar wazıypalar belgilep alınıp, «Abat shańaraq – abat kóshe – abat máhálle» ólshemi tiykarında awır sharayattaǵı máhállelerdegi mashqalalardı sheshiw baǵdarında wazıypalar belgilenip berilgen edi. Sonday-aq, rayonda baslanǵan úlken háreket sheńberinde máhálleler hám awıllardıń ishki xojalıq jolların ońlaw ushın arnawlı qum-shaǵıl tas aralaspası alıp kelinip atırǵanı hám bul boyınsha jumıslar imkaniyat dárejesinde keń kólemde dawam ettirilip, rayonda ońlanbaǵan topıraq jollar qum-shaǵıl tas aralaspalı jollarǵa aylandırılatuǵınlıǵın atap ótken edi.
Házirgi waqıtta rayonda belgilengen tapsırmalar boyınsha jumıslar alıp barılmaqta.
«Naymankól» APJ aymaǵındaǵı kóshelerde qum-shaǵıl tas aralaspası tóselip, puqaralardı kóp waqıttan berli qıynap kiyatırǵan mashqalalar óz sheshimin tappaqta. Awıl puqaralar jıyınında jasawshı puqaralar insan qádiri ushın islenip atırǵan bunday qolaylıqlardan minnetdar bolmaqta.
-Kóshelerimizdegi topıraq jollar jawın-shashınlı kúnlerde bárshemizdi qıynap kiyatırǵan edi. Mashqalalarımızdı unamlı sheship, jollarımızǵa qum-shaǵıl tas tósep berip atırǵanlıǵı ushın Húkimetimiz basshılarına, jol qurıwshı qurılasshılarǵa óz minnetdarshılıǵımızdı bildiremiz,-deydi «Naymankól» APJ turǵını Muzaffar Reyimbaev.

Qaraqalpaqstan xabar agentligi