Mámleketimiz aymaqları arasındaǵı ekonomikalıq teńsizlikti azaytıw, rayon hám qalalardı olardıń sharayatı, potencialı hám imkaniyatlarınan kelip shıǵıp rawajlandırıw arqalı kámbaǵallıqtı jáne de qısqartıw boyınsha engizilgen jańasha qatnaslar óz nátiyjesin bermekte.

Atap aytqanda, 2023-jıldan baslap 5-kategoriyaǵa tiyisli Qwshrabot rayonındaǵı isbilermenlik subyektlerin qollap-quwatlawdıń ayrıqsha tártibi engiziliwi esabınan olarǵa 2023-2024-jılları 12,7 milliard sumlıq salıq jeńillikleri berilgen. Nátiyjede ótken jıldıń ózinde derlik 700 isbilermenlik subyekti shólkemlestirilip, olardıń sanı 2,1 mıńǵa jetken hám 1 mıńǵa shamalas jańa jumıs orınları jaratılǵan.
Bul Senat keńesiniń májilisinde atap ótildi. Májiliste ótkerilgen Samarqand wálayatı sektor basshıları tárepinen kámbaǵallıqtan jıraq aymaqqa aylandırıw boyınsha Qushrabot rayonı tájiriybesiniń prezentaciyası dawamında investiciya baǵdarlaması sheńberinde 35,4 million dollarlıq tikkeley 41 joybar iske qosılǵanı atap ótildi. 23,6 million dollarlıq tikkeley sırt el investiciyaları ózlestirilgen. Еksport kólemi 3,5 million dollarǵa jetken. Sanaat – 109,5 procentke, qurılıs – 114,5 procentke, xızmetler –112,4 procentke, awıl xojalıǵı – 105,9 procentke ósken.
Máhállelerde kámbaǵallıqtı qısqartıw, isbilermenlik joybarlarına 54,2 milliard sumlıq jeńilletilgen kredit hám 1,5 milliard sumlıq subsidiya qarjıları ajıratılǵan.
Sayxunabad, Uyshi, Zarbdor hám Ǵıjduvan tájiriybelerin engiziw baslanǵan. Еkonomikalıq komplekstiń máhállege túsirilgeni esabınan 10 máhálle sanaat hám awıl xojalıǵına qánigelestirilgen, 1,2 mıń xalıq rásmiy jumıs penen bánt etilgen.
«Kámbaǵallıqtan abadanlıqqa qaray» baǵdarlaması sheńberinde bolsa jıldıń juwmaǵı menen 2,3 mıń shańaraq (10,7 mıń xalıq) kámbaǵallıqtan shıǵarılıp, kámbaǵallıq dárejesin 16,2 procentten 7,9 procentke azaytıwǵa erisilgen.
Dodalaw procesinde senatorlar aymaqta ámelge asırılǵan unamlı jumıslar menen birge rayondı sociallıq-ekonomikalıq rawajlandırıw, kámbaǵallıqtı qısqartıw hám xalıqtıń turmıs abadanlıǵın arttırıw baǵdarında óz sheshimin kútip turǵan ayırım máseleler hám iske qosılmaǵan imkaniyatlarǵa da toqtalıp ótti.
Sonıń ishinde, máhállelerde 2021-2022-jılları dúzilgen kishi sanaat zonaları zárúr infrastruktura menen támiyinlenbegeni sebepli házirgi kúnge shekem 3 kishi sanaat zonasınan 2 ewinde hesh bir joybar ámelge asırılmaǵanı atap ótildi.
Rayon aymaǵında bos turǵan 4 obyekt dáslepki bahası tómenletilip, bir neshe márte aukcionǵa shıǵarılǵanına qaramastan satılmaǵan. Rayonnıń, 5-kategoriyaǵa tiyisliliginen kelip shıǵıp, obyekt bahasın 5 jıl múddetke shekem bólip-bólip tólew imkaniyatı berilgen edi.
«Máhálle jetiligi» qararı menen qırqqa shamalas sociallıq járdem hám subsidiya qarjıların alıw imkaniyatı jaratılǵan bolsa da, ótken dáwir dawamında tek ǵana 3-4 túrinen paydalanılǵan. 6 máhállede kámbaǵal shańaraq aǵzalarına subsidiya qarjıların ajıratıw ilajları ulıwma kórilmegen.
Usı jıldıń 1-yanvarına kelip, fizikalıq táreplerdiń múlk hám jer salıǵınan qarızdarlıǵı ótken jılǵa qaraǵanda derlik 7,4 procentke artqan.
Májiliste senatorlar tárepinen «Kámbaǵallıqtan abadanlıqqa qaray» baǵdarlamasın ámelge asırıw boyınsha birinshi gezektegi ilajlar rejesindegi belgilengen ilajlardıń orınlanıwın óz waqtında hám sapalı támiyinlew boyınsha bir qatar pikir-usınıslar bildirildi.
Xalıq deputatları Samarqand wálayatlıq keńesi hám Qwshrabot rayonlıq keńesi janındaǵı kámbaǵallıqtı qısqartıw menen baylanıslı máseleler boyınsha komissiyalar tárepinen kámbaǵallıqtı qısqartıw baǵdarında belgilengen wazıypalar orınlanıwın monitoring etiw, bul máseleni keńes sessiyalarında dodalawdı shólkemlestiriw hám orınlanıwı artta qalıp atırǵan máseleler boyınsha qosımsha ilajlar belgilew boyınsha usınıslar berildi.

N.Abduraimova,
ÓzA