Ózbekstan, Qırǵızstan hám Qazaqstan energetika ministrleri hám Jáhán banki wákilleri Qambarata GЕS-1 qurılısı baslamasın ámelge asırıw procesin dodalaw ushın Tashkentte jıynaldı.

– Bul joybar Oraylıq Aziyanıń barlıq mámleketlerine teńsiz payda keltiredi, «jasıl» ekonomika ideyasın ámelge asırıw, suw resurslarınan nátiyjeli paydalanıw arqalı regionallıq energiya qáwipsizligin bekkemleydi,-dedi mámleketimizdiń energetika ministri Jwrabek Mirzamahmudov.
Qırǵızstan energetika ministri Taalaybek qurılajaq kompleks xalıqaralıq qarjı institutları hám rawajlanıw boyınsha birge islesiwshilerde úlken qızıǵıwshılıq oyatqanın atap ótip, bılay dedi:
– Regionallıq sheriklikti bekkemlew, pútkil Oraylıq Aziyanıń uzaq múddetli rawajlanıwına járdemlesiwdegi úlken imkaniyatın esapqa alıp, Qambarata 1-gidro elektr stanciyasın «Ásir joybarı» dep aytıw múmkin. Tashkent ushırasıwı 2024-jılı Vena, Bryussel hám Vashingtonda bolıp ótken sóylesiwler dúrkinin dawam ettirmekte. Bul sóylesiwler ulıwmalıq jumısımızdı muwapıqlastırıw, joybardı tezlestiriw, zárúr xalıqaralıq járdem tartıwǵa járdem beredi.
Qazaqstan Respublikası energetika ministriniń orınbasarı Sungat Esimxanov suw-energetika tarawındaǵı birge islesiw bekkemlenip atırǵanına itibar qaratıp, házirgi tatıw jasap atırǵan regionda uzaq múddetli turaqlılıqtı támiyinlewi, mámleketlerimizdiń sociallıq-ekonomikalıq rawajlanıwın qollap-quwatlawı ushın tiykar ekenin atap ótti.
– Biz úsh mámleket húkimetlerin turaqlı energetika keleshegin támiyinlew, ekonomikalıq ósiwdi jedellestiriw, puqaralardıń turmıs sapasın jaqsılaw baǵdarındaǵı háreketti qollap-quwatlawdan quwanıshlımız,-dedi óz gezeginde Jáhán bankiniń Oraylıq Aziya boyınsha regionallıq direktorı Tatyana Proskuryakova. – Házir basqa xalıqaralıq birge islesiwshiler menen birge Qambarata GЕS-1 baslamasın turmısqa qollanıw ushın zárúr qarjını tabıw jolında islep atırmız.
Ushırasıwda tárepler joybardı birgelikte islep shıǵıw hám ámelge asırıwǵa baylanıslı áhmiyetli principler boyınsha kelisimge eristi. Tiykarǵı basqıshlar belgilenip, rejeler tastıyıqlandı. Sonday-aq, ámeliy háreketlerdi muwapıqlastırıw, birge islesiw hám turaqlı rawajlanıwdı támiyinlew ushın ministrler dárejesinde, xalıqaralıq donorlar qatnasıwında turaqlı sóylesiwler ótkeriw zárúr ekenligi atap ótildi.

Muharrama Pirmatova, ÓzA