Házirden baslap báhárgi egis máwsimine tayarlıq kóriw, sonıń ishinde, atızlarǵa suw jetkeriw wazıypasın atqaratuǵın jap salmalardı tazalap, aǵın suwdıń irkinishsiz ótiwin támiyinlew hám jolda ısırap bolıwınıń aldın alıw ushın sharayatlar jaratıw egis máwsimi waqtında jumıslardıń jeńillesiwine múmkinshilik jaratadı.

Usı maqsette – respublikamızdaǵı kanallar hám ishki salmalardı betonlaw jumısları dawam etip, Taqıyatas rayonındaǵı ishki jap-salmalarǵa da qurǵaq beton tóselmeler jatqarılmaqta,-dep xabar bermekte Suw xojalıǵı ministrliginiń málimleme xızmeti.
Taqıyatas rayonı “Suw jetkeriw xızmeti” mámleketlik kárxanası tárepinen házirgi waqıtta Naymankól awıl puqaralar jıyını aymaǵındaǵı “Alibek salma”ǵa qurǵaq beton tóselmeler jatqarılmaqta.
Bul ilaj da ishki suwǵarıw tarmaqlarında suwdıń ısırap bolıwın azaytıwǵa qaratılǵan ilajlarǵa jańasha qatnaslardıń biri bolıp esaplanadı.
Maǵlıwmat ushın, ótken jılǵı gúzgi máwsimde Qaraqalpaqstan Respublikası Suw xojalıǵı ministrligi tárepinen Nókis rayonında kanallardı beton qatlamı ornına paydalanıw múmkin bolǵan geomembarna, geotekstil hám geokompozit ónimlerin óndiriwshiler menen kórgizbeli hám ámeliy-seminar ótkerilip, onda qurǵaq beton tóselmeler hám suwdıń ısırapgershiligin azaytıw boyınsha innovaciyalıq usıllar haqqında keń túrde maǵlıwmatlar berilgen edi.

Á.Jiyemuratov,
Qaraqalpaqstan xabar agentligi