Xalqımızdıń abadan turmısın támiyinlew baǵdarında búgingi kúnde keń kólemli jumıslar ámelge asırılmaqta. Respublikamızdı sociallıq-ekonomikalıq jaqtan rawajlandırıw, máhállelerdiń infrastrukturasın jaqsılaw, jańa turaq jaylardı qurıw hám basqa da ámeliy jumıslarda Prezidentimizdiń ayrıqsha itibarı bekkem tiykar bolıp xızmet etpekte.

Qońırat rayonındaǵı «Jaslıq» posyolkalıq puqaralar jıyını aymaǵında jańa kóp qabatlı turaq jaylar paydalanıwǵa tapsırıldı.
Máresimde Qaraqalpaqstan Respublikası Joqarǵı Keńesiniń Baslıǵı Amanbay Orınbaev turǵınlardı jańa turaq jaylardıń paydalanıwǵa tapsırılıwı menen qutlıqladı. Ózbekstan Respublikası Ministrler Kabinetiniń 2021-jıl 31-avgusttaǵı «Qaraqalpaqstan Respublikasındaǵı avariyalıq jaǵdayındaǵı hám ruwxıy eskirgen kóp kvartiralı turaq jaylardı renovaciyalaw arqalı xalıqtıń turmıs sharayatların jáne de jaqsılaw ilajları haqqında»ǵı 557-sanlı qararı tiykarında «Jaslıq» posyolkasında jaylasqan avariyalıq jaǵdaydaǵı kóp kvartiralı jaylardı renovaciyalaw Ózbekstan Respublikası respublikalıq byudjetiniń qosımsha dárekleriniń 35 milliard sumlıq qarjısı esabınan jańadan bes qabatlı, 180 kvartiralı, barlıq qolaylıqlarǵa iye turaq jaylar qurılıp, paydalanıwǵa tapsırılǵanlıǵı atap ótildi.
Álbette, bul jańa turaq jaylar aymaq xalqı ushın uzaq jıllar dawamında xızmet etedi dep isenemiz. Aymaq turǵınları óz gezeginde Prezidentimizdiń Qaraqalpaqstanǵa bolǵan ayrıqsha ǵamqorlıǵınan sheksiz minnetdarshılıǵın bildirmekte.

Qaraqalpaqstan xabar agentligi