“Qaraqalpaq suw tǝmiynatı” AJ da ǵalaba xabar qurallarınıń wákilleri hám blogerler ushın baspasóz konferenciyası shólkemlestirildi. Onda xalıqtı ishimlik suwı menen tǝmiyinlew, kanalizaciya xızmetlerin kórsetiw boyınsha jámiyet tǝrepinen 2024-jıl dawamında alıp barılǵan jumıslar hǝm 2025-jılda isleniwi tiyis bolǵan wazıypalar tuwralı maǵlıwmatlar berildi.

Búgingi kúnde respublikamızda jasawshı jǝmi 2 mln. 29 mıń. adamnıń 1 mln. 505 mıńı, yaǵnıy 74,2 procenti oraylastırılǵan ishimlik suwı menen tǝmiyinlengen. Qalǵan 25,8 procenti, yaǵnıy 524 mıń adam alternativ ishimlik suw dereklerinen paydalanadı.
Respublikamızda 311 suw qurılmaları bar. Jǝmiyet tárepinen xalıqqa tiykarǵı 3 suw tazalaw qurılması arqalı ishimlik suwı jetkerip beriledi.
Sonıń ishinde “Túyemoyın” suw tazalaw qurılmasınıń quwatlılıǵı sutkasına 140 mıń, “Taqıyatas” suw tazalaw qurılmasınıń quwatlılıǵı sutkasına 60 mıń metr kub. Onıń quwatlılıǵın sutkasına 120 mıń m3.qa jetkeriw boyınsha joybarlaw jumısları ǝmelge asırılmaqta.
Nókis qalasınıń tiykarǵı ishimlik suw dáregi bolǵan “Nókis” suw tazalaw qurılmasında búgingi kúnde respublikalıq byudjet qarjıları esabınan quwatlıǵın sutkasına 65 mıńnan 90 mıń m3.qa jetkeriw boyınsha qurılıs jumısları ǝmelge asırılmaqta.
Sonday-aq, respublikamız boylap aqaba suw shıǵarıw xızmeti (kanalizaciya) menen tǝmiyinlengenlik dǝrejesi 5,4 procentti quraydı. Nókis qalası, Beruniy, Qanlıkól, Moynaq, Taqıyatas hǝm Shımbay rayonlarında 80 aqaba suw qurılmaları hǝm 223,2 kilometrlik kanalizaciya tarmaqları bar.
Búgingi kúnde jǝmiyet 259 mıń 635 abonentke xızmet kórsetip kelmekte.
Press-konferenciyada qatnasıwshılar xalıqtı ishimlik suwı menen támiyinlew, onıń sapasın arttırıw baǵdarındaǵı jumıslar boyınsha ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi