Xabar berilgenindey, Ózbekstan Respublikası Prezidenti Shavkat Mirziyoev Tashkent wálayatındaǵı «Ámirsay» kurort kompleksinde Qırǵız Respublikası Prezidenti Sadir Japarov penen rásmiy emes ushırasıw ótkerdi.

Qırǵızstan jetekshisi óziniń sociallıq tarmaqlardaǵı betinde ushırasıw haqqında jazıp, «Ámirsay» kurort kompleksinde xızmet kórsetiw dárejesi Evropanikinen kem emesligin atap ótti.
– Mámleketimiz aymaǵınıń 94 procentin tawlar iyelegen, jeti wálayattıń hár birinde taw-shańǵı kurortların qurıw múmkin. Biraq bizde derlik joq. Nege! Sebebi, ǵárezsizlikke eriskenimizden berli biz ápiwayı xalıqtan baslap Prezidentke shekem tek ǵana siyasat penen shuǵıllanıp keldik. Еkonomika, turizm hám basqa áhmiyetli tarawlarǵa derlik itibar berilmedi. Kásiplesim Shavkat Mirziyoev «Ámirsay» kurortın nolden, Tashkentke jaqın aralıqta qurǵan. Xızmet kórsetiw dárejesi Evropanikinen kem emes. Qanshadan-qansha adamlar jumıs penen támiyinlengen. Millionlaǵan turistler bul jerge dem alıw ushın kelmekte,-dedi Qırǵızstan jetekshisi.
2019-jılı ashılǵan «Ámirsay» kompleksi Oraylıq Aziyadaǵı eń iri zamanagóy taw-shańǵı kurortı bolıp esaplanadı.
Esletip ótemiz, kompleks Chatqal sistemasınıń bir bólegi bolǵan Maǵashkan tawınıń arqa bóleginde 900 gektar maydandı iyeleydi. Shańǵı bólimleriniń biyikligi 1 mıń 630 metrden 2 mıń 275 metrge shekem. Kópshilik jollar jańa baslawshılar hám orta dárejedegi shańǵıshılar ushın sáykes keledi.

Behruz XUDOYBERDIEV,
ÓzA