Nókis qalasında jaylasqan «Aqquw» kompleksinde «Arzıwdan tabısqa shekem…» súreni astında respublikamız hayal-qızlar forumınıń saltanatlı ashılıw máresimi ótkerildi.

Máresimde Ózbekstan Respublikasi Bas ministriniń orınbasarı, shańaraq hám hayal-qızlar komitetiniń baslıǵı Z.Mahkamova, Qaraqalpaqstan Respublikasi Joqarǵı Keńesi Baslıǵınıń orınbasarı R.Saparbaev, Ministrler Keńesi Baslıǵınıń orınbasarı– shańaraq hám hayal-qızlar komitetiniń baslıǵı M.Axmedova shıǵıp sóylep, ilaj qatnasıwshıların qutlıqladı. Ilajda atap ótilgenindey, sońǵı jılları mámleketimizde hayal-qızlardı qollap-quwatlaw mámleketlik siyasattıń baslı baǵdarlarınıń birine aylandı. Bul boyınsha olar ushın jańa imkaniyatlar jaratılıp, barlıq sala hám tarmaqlarda, jámiyetimizde hayal-qızlardıń ornı artıp barmaqta.
Ótkerilgen forum da bul baǵdardaǵı jumıslardıń dawamı bolıp, isbilermen hayal-qızlar arasında óz-ara qarım-qatnas ortalıǵın jaratıw hám tájiriybe almasıw, isbilermenlikti rawajlandırıw hám olardı isbilermenlikke keńnen tartıw, dáramatlardı arttırıwǵa járdem beriw hám finanslıq bilimin arttırıwǵa xızmet etiwi menen áhmiyetli bolıp tabıladı.
Álbette, ótkerilgen forum hayal-qızlar arasında isbilermenlikti keńnen en jaydırıw hám olardıń dáramatın arttırıwǵa qolaylı ortalıq jaratatuǵınına isenimimiz kámil.

Qaraqalpaqstan xabar agentligi