Ilimge qushtar jaslardıń ideyaların ámelge asırıwǵa járdem beriw hám olardı qollap-quwatlaw maqsetinde bir qatar jumıslar ámelge asırılmaqta.

24-yanvar kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Joqarı bilimlendiriw, ilim hám innovaciyalar ministrligi janındaǵı Innovaciyalıq rawajlanıw agentligi hám Jaslar akademiyası tárepinen jaslardıń ilimiy-innovaciyalıq ideyaları hám startap joybarların qollap-quwatlaw maqsetinde shólkemlestirilgen «Bolajaq alım» ilimiy ideyalar tańlawında jeńimpaz dep tabılǵan qaraqalpaqstanlı jaslardı sıylıqlaw ilajı bolıp ótti.
Ilajǵa Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov qatnasıp, tańlaw jeńimpazların qutlıqladı. Sertifikat jáne ilimiy joybarların ámelge asırıw ushın ajıratılǵan qarjılay sıylıqlardı tapsırdı.
Sıylıqlanǵan jaslardıń arasında Nókis mámleketlik pedagogikalıq institutı Biologiya qánigeliginiń 1-kurs magistrantı Jalalatdin Usnatdinovta bar. Ol óziniń «Mikro suw otların jetilistiriw ushın innovaciyalıq fotobioreakt islep shıǵarıw» ilimiy ideyası menen qatnasıp jeńimpaz dep tabılǵan.
– Meniń ilimiy ideyamdı qollap-quwatlap, maǵan óz imkaniyatlarımdı ámelge asırıwıma járdem bergeni ushın shólkemlestiriwshilerge, ustazlarıma úlken minnetdarshılıq bildiremen, – deydi usı tańlaw jeńimpazı J.Usnatdinov.
Ministr innovator jaslarǵa ilimiy ideyaların ámeliyatqa keńnen engizgen halda joqarı nátiyjelerge erisiwine tilekleslik bildirdi.

Qaraqalpaqstan xabar agentligi