Ózbektan Respublikası Mádeniyat ministrligi tárepinen Qaraqalpaqstan Respublikasındaǵı mádeniy mákemelerdiń jumısların kompleksli rawajlandırıw, mádeniyat hám kórkem óner tarawında ámelge asırılǵan jumıslardı keńnen úgit-násiyatlaw maqsetinde taraw pidayıları, qánigeleri hám kórkem óner ǵayratkerleriniń qatnasıwında respublikamızda press-tur ótkerilmekte.

Ilaj Nókis qalasındaǵı Jaslar orayında Ózbekstan Respublikası Mádeniyat ministri Ozodbek Nazarbekovtıń kórkem óner tarawı boyınsha bilim alıp atırǵan student hám oqıwshı-jaslar, talantlı jaslar, mámleketlik sıylıq iyeleri hám stependiantlar, xalıqaralıq tańlawlardıń jeńimpazları menen ushırasıwdan baslandı.
Atap ótilgenindey, sońǵı jeti jılda Qaraqalpaqstan Respublikasında bir qatar jańa mádeniyat hám kórkem óner dárgayları boy tikledi.
Atap aytqanda, Moynaq, Xojeli, Ellikqala, Shımbay rayonlarında 150 orınlıq balalar muzıka hám kórkem óner mektepleri hám Nókis qalasında Opera hám baqsıshılıq kórkem ónerine qánigelestirilgen mektep-internatı jańadan qurılıp, paydalanıwǵa tapsırıldı.
Moynaq, Bozataw, Shımbay, Qońırat rayonlarında amfiteatr imaratı, investiciyalıq baǵdarlama tiykarında Respublika kózi ázziler kitapxanası jańadan qurıldı.
Qaraqalpaq mámleketlik Jas tamashagóyler teatrı hám Qaraqalpaq mámleketlik Quwırshaq teatrı da jańadan qurılıp, paydalanıwǵa tapsırıldı.
Sonıń menen birge, Berdaq atındaǵı Qaraqalpaq mámleket muzıkalı teatrına “Akademiyalıq teatr” statusı berildi.
Mádeniyat obyektlerin qurıw, rekonstrukciyalaw, ońlaw, qayta tiklew maqsetinde, 2017-2024-jıllarda 15 mádeniyat hám kórkem óner mákemeleri jańadan qurıldı, 10 mádeniyat hám kórkem óner mákemeleri rekonstrukciyalandı hám 18 mádeniyat hám kórkem óner mákemeleri iri ońlawdan shıǵarılıp, zamanagóy úskeneler menen támiyinlendi.
Búgingi kúnde Qaraqalpaqstan Respublikasında jámi 99 mádeniyat mákemesi bolıp, sonnan, 3 mámleketlik hám 1 jeke menshik teatrlar, 5 koncert shólkemleri, 60 mádeniyat orayı, 3 qánigelestirilgen mádeniyat hám kórkem óner mektebi hám mektep internatı, 24 balalar muzıka hám kórkem óner mektepleri, 2 joqarı bilimlendiriw mákemeleri, 1 respublikalıq kózi ázziler kitapxanası jáne onıń 9 filialı jumıs islep turıptı.
Ushırasıw dawamında ministr jaslar qashan jámiyetimizdiń rawajlanıwı ushın birlesip bel baylasa, olardı jeńe alatuǵın kúsh joq ekenin atap ótip, jaratılǵan sharayatlardan utımlı paydalanıp, elimiz ushın zárúr kadr, kámil insan bolıp jetilisiwi kerekligin atap ótip, bahalı másláhátlerin berdi.
Óz gezeginde jaslardıń da pikir-usınısları tıńlanıp, olar ózlerin qızıqtırǵan sorawlarǵa juwap aldı.
Press-tur Kegeyli, Xojeli rayonlarında hám Nókis qalasındaǵı qurılıs, obyektlerinde dawam etip, ilaj qatnasıwshıları dáslep Kegeyli rayonındaǵı 31-sanlı «Xalqabad» Mádeniyat orayı imaratı menen tanıstı.
Prezidentimizdiń basshılıǵında 2023-jıl 22-dekabr kúni Respublikalıq Ruwxıylıq hám aǵartıwshılıq keńesiniń keńeytilgen májilisinde hár bir rayonda saxna zalı, kitapxana, kinozal hám dógerek xanaları bolǵan birewden úlgi mádeniyat orayınıń jumısı jolǵa qoyılatuǵını haqqında tapsırma berilgen edi.
Tapsırmaǵa tiykarlanıp, 1963-jılı qurılǵan “Xalqabad” mádeniyat orayınıń eski imaratı buzılıp, 2 milliard 700 million sum qarjı esabınan rekonstrukciya jumısları alıp barıldı hám jańadan qurılıp, 2024-jılı qayta paydalanıwǵa tapsırıldı.
“Xalqabad” mádeniyat orayı 168 orınǵa mólsherlengen bolıp, 5 dógerek jumıs alıp barmaqta. Olarǵa 60 qa shamalas aymaq jasları qamtıp alınǵan.
Miymanlar sapar dawamında Mádeniyat orayı imaratında jaratılǵan sharayatlar menen tanıstı hám orayda Kegeyli rayonınıń xalqına koncert baǵdarlaması qoyıp berildi.
Maǵlıwmat ornında, xalıqtıń bos waqıtın mazmunli ótkeriwde Ózbekstan Respublikası boylap, 837 (Qaraqalpaqstan Respublikasında 60 mádeniyat orayları ámeldegi) mádeniyat orayları jumıs alıp barmaqta. Olarda 4 mıńǵa shamalas dógerekler jumıs islep turıptı hám olarǵa 48 mıńnan aslam jaslar qamtıp alınǵan.
Press-turdıń gezektegi mánzili Xojeli rayonındaǵı 4-sanlı balalar muzıka hám kórkem óner mektebi boldı.

Xojeli rayonındaǵı bul mektep 1957-jılı shólkemlestirilgen bolıp, Ózbekstan Respublikası Prezidentiniń “Balalar muzıka hám kórkem óner mektepleriniń jumısların jáne de jetilistiriw boyınsha 2016-2020-jıllarǵa mólsherlengen mámleketlik baǵdarlaması haqqında»ǵı qararına muwapıq, 2019-jılda 4 mlrd. 950 mln. sum qarjı esabınan rekonstrukciyalanǵan.
Mekteptiń ulıwma quwatlılıǵı 150 orınǵa mólsherlengen bolıp, házirgi waqıtta 180 nen aslam oqıwshı oqıp atır. Sonıń menen birge, mekteptiń 150 orınlıq koncert zalı, kitapxanası hám 25 oqıw bólmesi bolıp, mektep kitapxanasında 470 ten aslam muzıkalıq ádebiyatlar hám notalar fondı jıynalǵan.
Házirgi kúnde mektepte 32 pedagog xızmetkerler xızmet kórsetip atır.
Mektepte oqıwshılar 2024-2025-oqıw jılında 8 baǵdar (fortepiano, tarlı asbap, xalıq saz asbapları, baqsı-jıraw, estrada, xoreografiya, súwretlew kórkem óneri, teatr kórkem óneri) boyınsha tálim-tárbiya almaqta.
Jetiskenliklerin atap ótetuǵın bolsaq, mektep oqıwshıları arasında 2022-jılı Erkinay Orınbaeva hám 2023-jılı Gúlshınar Qudaybergenova Zulfiya atındaǵı Mámleket sıylıq iyesi boldı. Sonday-aq, mektep oqıwshıları bir qansha tańlaw hám festivallarda belsene qatnasıp joqarı nátiyjelerge erisip kelmekte.
Soń, Ózbekstan Respublikası Mádeniyat ministri O.Nazarbekovtıń basshılıǵındaǵı ziyalılar toparı hám qánigeleri Nókis qalasındaǵı Ózbekstan mámleket konservatoriyası Nókis filialı jańa imaratınıń qurılıs jumısları menen tanıstı.
Ózbekstan Respublikası Prezidentiniń 2023-jıl 25-dekabrdegi “2024-2026-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı qararına muwapıq 2024-jılı Ózbekstan mámleket konservatoriyasınıń Nókis filialı ushın 300 orınlıq oqıw imaratın qurıw hám iri ońlaw ushın 27 mlrd. sumlıq qarjı ajıratılǵan bolıp, házirgi kúnde ońlaw jumısları alıp barılmaqta. Bul obyektti paydalanıwǵa tapsırıw múddeti 2025-jıldıń ekinshi yarım jıllıǵı etip belgilengen.
Qurılıstıń barısı menen tanısıw barısında obyekttti paydalanıwǵa tapsırıw, úskenelew hám bezew máseleleri, qurılıs jumısların sapalı ámelge asırıw boyınsha pikir-usınıslar bildirildi.
Jaslar orayında mádeniyat ministrinin baspasóz xatkeri-málimleme siyasatı boyınsha másláháshisi Sirojiddin Wsarovtıń qatnasıwında press-tur boyınsha brifing bolıp ótti.
Qatnasıwshılar ózlerin qızıqtırǵan sorawlarǵa juwap aldı.

Á.Jiyemuratov,
Qaraqalpaqstan xabar agentligi.