Ájiniyaz atındaǵı Nókis mámleketlik pedagogikalıq institutında hayal-qızlar másláhát keńesi menen birgelikte jámiyette hayal-qızlardıń ornı hám belsendiligin arttırıw, olardı hár tárepleme qollap-quwatlaw baǵdarında ámelge asırılıp atırǵan jumıslardı dodalawǵa arnalǵan ashıq sáwbetlesiw ilajı bolıp ótti,-dep xabar bermekte instituttıń baspasóz xatkeri I.Mátekov.

Ilajǵa fakultet dekanlarınıń hayal-qızlar máseleleri boyınsha másláhátshileri, student-qızlar hám ǵalaba xabar qurallarınıń wákilleri qatnastı.
Dógerek sáwbet formatında ótkerilgen ashıq sáwbetlesiwde instituttıń mektepke shekemgi bilimlendiriw kafedrasınıń docenti Lizaxan Ibragimova, hayal-qızlar máseleleri boyınsha másláhátshiler Sulıwxan Palwaniyazova hám Nodira Allambergenovalar shıǵıp sóylep, házirgi waqıtta hayal-qızlardıń huqıqların qorǵaw, ilim, bilimlendiriw hám isbilermenlik tarawlarındaǵı jumısların rawajlandırıwǵa baǵdarlanǵan kóplegen baslamalar menen baǵdarlamalar ámelge asırılıp atırǵanlıǵın atap ótti.
Ásirese, mámleketimiz basshısınıń tikkeley baslaması menen hayal-qızlardı bilimlendiriw hám kásiplik jaqtan rawajlandırıw, olardıń bántligin támiyinlew, salamatlıq hám huqıqıy jaqtan qollap-quwatlaw, siyasiy hám jámiyetlik belsendiligin arttırıwǵa mámleketlik dárejede dıqqat qaratılmaqta.
Búgingi kúnde institutta 700 ge shamalas professor-oqıtıwshılar jumıs islep atırǵan bolsa, solardan 300 ge shamalası hayal-qızlardan ibarat. Olardıń arasınan 17 ilim doktorı hám professorlar, 97 ilim kandidatı hám filosofiya doktorları, 38 úlken oqıtıwshı hám 150 assistent hám stajyor-oqıtıwshılar jaslar tálim-tárbiyasında erler menen bir qatarda teńdey miynet etip, qánigeli pedagog kadrlar tayarlawǵa múnásip úleslerin qospaqta. Sonıń menen birge, 240 qa shamalas hayal-qızlar hár qıylı qánigelikler menen bólimlerde ayanbay miynet etpekte.
Institutta ulıwma 16 mıńǵa shamalas student hám magistrantlar oqıp atırǵan bolsa, sonnan 12 mıńǵa shamalası hayal-qızlar bolıp tabıladı. Olardıń huqıqları menen máplerin qorǵaw, oqıw hám ilimiy-izertlew, jámiyetlik jumıslardaǵı belsendiligin arttırıw maqsetinde úgit-násiyat jáne ámeliy jumıslar turaqlı túrde ámelge asırılmaqta.
Ilajda mámleketimizde hayal-qızlardıń bilim alıwı ushın qosımsha imkaniyatlar jaratıw, olardıń kásiplik sheberliklerin arttırıw maqsetinde jolǵa qoyılǵan arnawlı kurslar hám treningler haqqında maǵlıwmatlar berildi.
Atap aytqanda, Prezidentimizdiń pármanı tiykarında qaraqalpaqstanlı jaslar ushın joqarı oqıw orınlarına qosımsha 10 000 orınlıq kvota ajıratılǵanlıǵı, magistratura qánigeliklerinde tólemli kontrakt tiykarında oqıp atırǵan hayal-qızlardıń kontrakt tólemlerin mámleketlik byudjet qarjıları esabınan qaplap beriw tártibi engizilgenligi, ijarada jasaytuǵın studentler ushın ijara tóleminiń yarımı mámleketlik byudjet esabınan tóleniwi jolǵa qoyılǵanlıǵı, «Hayal-qızlar dápteri», «Temir dápter» hám «Jaslar dápteri» sisteması tiykarında sociallıq járdemge mútáj hayal-qızlar jáne usınday shańaraqlardıń perzentleri ushın qosımsha imkaniyatlar jaratılıp atırǵanı anıq mısallar tiykarında kórsetip ótildi.
Ashıq sáwbetlesiw juwmaǵında hayal-qızlar másláhát keńesi aǵzaları institutta usı formatta respublikalıq konferenciya shólkemlestiriw boyınsha aldaǵı islenetuǵın jumıslardı kelisip aldı.

Qaraqalpaqstan xabar agentligi.