Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń basshılıǵında Ámiwdárya rayonın kompleksli rawajlandırıw baǵdarındaǵı rejelerge arnalǵan májilis bolıp ótti.

Onda rayondı sociallıq-ekonomikalıq rawajlandırıw, máhállelerdegi infrastrukturalıq, sociallıq hám basqa da mashqalalarǵa sheshim tabıw, isbilermenlikti rawajlandırıw, rayondı «Kámbaǵallıqtan awlaq aymaq»qa aylandırıw sıyaqlı áhmiyetli máseleler sóz etildi.
Májiliste rayonda ótken jıllar dawamında ámelge asırılǵan qurılıs, abadanlastırıw jumısları, aymaqqa investiciyalardı tartıw, sanaat, eksporttı bunnan bılay da rawajlandırıw baǵdarında ámelge asırılǵan jumıslar dodalandı.
Sonday-aq, kóp jıllar dawamında xalıqtı qıynap kelgen mashqalalı máselelerdi unamlı sheshiw, awır sharayattaǵı máhállelerdi abat etiw baǵdarında ámelge asırılıwı kerek bolǵan tiykarǵı wazıypalar belgilendi. Bunıń ushın barlıq múmkinshilikler bar ekenligi, húrmetli Prezidentimizdiń ayrıqsha itibarı menen tiyisli qarjılar da ajıratılǵanı, eń baslısı, bul jumıslardı awızbirshilikli hám shólkemleskenlik penen alıp barıw arqalı puqaralardıń abadan turmısın támiyinlewge erisiletuǵınlıǵı Joqarǵı Keńes Baslıǵı tárepinen ayrıqsha atap ótildi.

Qaraqalpaqstan xabar agentligi