Sońǵı jılları elimizde jaslarımızdı Watansúyiwshilik ruwxında tárbiyalap, olar arasında milliy qádiriyatlarımızdı keńnen en jaydırıw hám úgit-násiyatlaw baǵdarında kóplegen ruwxıy-aǵartıwshılıq ilajlar ámelge asırılıp kelinbekte. Bul bolsa, ósip kiyatırǵan jas áwlad wákilleriniń kámil insan bolıp jetilisiwinde áhmiyetli orın tutpaqta.

Taxtakópir rayonı Mádeniyat orayında rayonlıq hayal-qızlar bólimi hám «Órnekli hayallar» toparı aǵzalarınıń baslaması menen hayal-qızlardıń jámiyetlik-siyasiy belsendiligin arttırıw, xalqımız arasında ruwxıy-aǵartıwshılıq ortalıǵın jǝne de kúsheytiw maqsetinde ótkerilgen «Anam aytqan háyyiwler» hám «Analar qosıq aytqanda» atamasında ruwxıy-aǵartıwshılıq ilajın da usılar qatarına kirgizsek boladı.
Ilajda rayonlıq «Órnekli hayallar» toparı baslıǵı A.Qabılbekova, rayonlıq Ishki isler bóliminiń hayal-qızlar mǝseleleri boyınsha aǵa inspektorı, kapitan B.Baxievalar shıǵıp sóylep, elimizde hayal-qızlar hám jaslardı hǝr tǝrepleme qollap-quwatlaw, olardıń jámiyetimizde siyasiy belsendiligin arttırıw baǵdarında ámelge asırılıp atırǵan ilajlar hám olarǵa jaratılǵan keń imkaniyatlar haqqında aytıp ótti.
Ilaj rayonlıq mádeniyat bólimi hǝm «Analar ansambli» jámáátiniń xalqımızdıń milliy salt-dástúrlerin sáwlelendiriwshi saxnalıq kórinisleri menen kewilli dawam etip, bul qatnasıwshılarǵa ózgeshe zawıq baǵıshladı.

Adilbay Orazov,
Qaraqalpaqstan xabar agentligi sholıwshısı