Prezident Shavkat Mirziyoev 22 –yanvar kúni joqarı bilimlendiriӯ hám ilim taraӯındaǵı tiykarǵı ӯazıypalarǵa baylanıslı prezentaciya menen tanıstı.

Mámleketimiz raӯajlanıӯınıӊ súyenishi sıpatında bul baǵdarlarǵa úlken itibar qaratılmaqta. Jaӊa joqarı oqıӯ orınları ashılıp, qamtıp alıӯ oǵada keӊeydi. Bilimlendiriӯ processleri sapa jaǵınan jaqsılanbaqta.
Ótken jılı bakalavriat baǵdarları optimallastırılıp, 1 mıӊ 200 den aslam bilimlendiriӯ baǵdarları sırt el standartlarına beyimlestirildi. Sonıӊ ishinde, pitkeriӯshilerge mamanlıq talap tolıq jaӊalandı, qayta tikleniӯshi energiya derekleri, qorshaǵan ortalıq injenerligi, biosistemalar injenerligi sıyaqlı zamanagóy baǵdarlar ashıldı.
Bıyıl da bir qatar áhmiyetli ӯazıypalar belgilengen. Atap aytqanda, jáne mıńnan aslam bilimlendiriӯ baǵdarları «TOP-300» universitet baǵdarları tiykarında jetilistiriledi. 45 bilimlendiriӯ baǵdarları xalıqaralıq akkreditaciyadan ótkeriledi. Joqarı oqıӯ orınlarında Registrator ofisi xızmetleri menen studentler tolıq qamtıp alınadı. Dual bilimlendiriӯge jáne 50 mıӊ student tartıladı.
Joqarı bilimlendiriӯde ilimiy potencialdı 55 procentke shıǵarıӯ, sırt elde 5 mıӊ pedagogtıń mamanlıǵın arttırıӯ rejelestirilgen. Aldınǵı injenerlik mekteplerin 25 ke jetkerip, sanaat kárxanaları menen joybarlardıӊ bahasın 10 esege arttırıӯ maqset etilgen.
Prezentaciyada juӯapkerler usı baǵdarda ámelge asırılatuǵın jumıslar haqqında málimleme berdi.
Bizge belgili, joqarı bilmlendiriӯge qabıllaӯ processinde «aldın test, keyin taӊlaӯ» principine ótildi. Mámleketlik grant studentlerdiӊ qábiletine qarap ajıratılatuǵın boldı. Qarjılay erkinlik berilgen 40 joqarı oqıӯ ornında Registrator ofisi shólkemlestirildi. Nátiyjede dekanat hám bólimlerde shtatlar 20 procentke qısqarıp, 30 xızmet túri sanlastı.
Bul tájiriybeden kelip shıǵıp, usınday ofislerdi basqa joqarı oqıӯ orınlarında da ashıӯ, bilimlendiriӯ hám ilim xızmetlerin qamtıp alǵan birden-bir sanlı sistema engiziӯ boyınsha kórsetpeler berildi.
Ámeliyat penen baylanıstı kúsheytiӯ maqsetinde dual bilimlendiriӯ jolǵa qoyılmaqta. Házirde 15 mıӊ student 957 kárxanaǵa biriktirilgen. Biraq kárxanalarda oǵan qızıǵıӯshılıq joq. Sonlıqtan dual bilimlendiriӯde qatnasıp atırǵan kárxanalardı xoshametleӯ boyınsha usınıslar bildirildi.
2024-jıl 20-iyunda bolıp ótken videoselektor májilisinde mámleketimiz basshısı hár bir aymaqta texnika universiteti hám aldınǵı injenerlik mekteplerin shólkemlestiriӯ ӯazıypasın qoyǵan edi. Házirge shekem Termiz, Ándijan hám Qarshıda texnika universitetleriniӊ jumısı jolǵa qoyıldı. Sonday-aq, 8 injenerlik mektebi ashıldı.
Májiliste Nókis, Buxara, Ferǵana hám Namangan texnika universitetlerin shólkemlestiriӯ joybarları tanıstırıldı. Oǵan bola, jaӊa baǵdarlar ashılıp, sırt el baǵdarlamaları engiziledi, studentlerdiӊ ilimiy-innovaciyalıq processlerde qatnasıӯı keӊeytiledi, universitetlerde sanaat birge islesiӯshileri biriktiriledi.
Ulıӯma, bul baǵdardaǵı 35 mákemeni keӊeytiӯ esabınan, 22 texnika universiteti shólkmlestiriledi. Bıyılǵı jıldıӊ aqırına shekem jáne 17 injenerlik mektebi ashıladı.
Soӊǵı jıllarda joqarı oqıӯ orınlarında ilimiy potencial 41 procentten 45 procentke artqan. Biraq, kópshilik ilimiy izertleӯler sanaat hám óndiristegi zamanagóy tendeciyalardı qamtıp almay atır.
Sonlıqtan doktorantura kvotasın bólistiriӯde ekonomikanıӊ drayver taraӯlarına áhmiyet qaratıӯ, ilimiy dáreje hám ataqlar alıӯ tártibin jetilistiriӯ boyınsha kórsetpeler berildi. Pedagoglardıń kásiplik sheberligin arttırıӯdı jaӊa basqıshqa alıp shıǵıӯ zárúr ekenligi atap ótildi.
Jaslar tárbiyasında tálim-tárbiya hám sport ta áhmiyetli. Bul baǵdarda «Bes baslama», «Máripat taratıp», «Studentler sport ligası», «Zákawat» sıyaqlı háreketler jolǵa qoyılǵan. Bunday ruӯxıy-aǵartıӯshılıq, sport hám intellektuallıq joybarlar menen studentlerdi tolıq qamtıp alıӯ, jaslarda ӯatansúyiӯshilik ruӯxın kúsheytiӯ ilajları boyınsha málimleme berildi.

ÓzA