Jaslardıń sapalı hám qolaylı bilim alıwına qaratılıp atırǵan úlken itibardıń ámeliy kórinisi sıpatında 22-yanvar kúni Berdaq atındaǵı Qaraqalpaq mámleketlik universitetinde «Rektor hám jaslar» atamasında ushırasıw bolıp ótti.

Ushırasıwda universiteti rektorı, akademik Axmed Reymov, prorektorlar, bólim baslıqları, professor-oqıtıwshılar hám student-jaslar qatnastı. Ilajdan gózlengen maqset student-jaslardıń mashqala hám usınısların tıńlaw, olardıń talap hám mútájliklerin qanaatlandırıw, sonday-aq, universitet turmısındaǵı áhmiyetli máselelerdi dodalawdan ibarat boldı.
Ushırasıw aldınan universitet tárepinen alıp barılıp atırǵan jumıslar, student-jaslardı qollap-quwatlaw baǵdarındaǵı ilajlar haqqında tayarlanǵan video rolik jıynalǵanlardıń názerine usınıldı. Bunnan soń, universitet rektorı A.Reymov shıǵıp sóylep, jaslardıń ilim tarawındaǵı jetiskenlikleri, jámiyetlik turmıstaǵı belsendiligi hám olardıń mámlekettiń rawajlınıwındaǵı ornına ayrıqsha toqtap ótti. Sonday-aq, «Búgingi jaslar – erteńgi kúnimizdiń tiykarı, olardıń hár bir baslaması hám umtılısı biz ushın áhmiyetli. Sonlıqtan da universitetimiz administraciyası hár bir studenttiń pikirin tıńlawǵa, mashqalaların sheshiwge tayar,» – dedi rektor A.Reymov.
Ushırasıw dawamında student-jaslar ózlerin qızıqtırǵan sorawlar menen múrájat etti. Tiykarınan bilimlendiriwdiń sapasın arttırıw, sabaq processlerin innovaciyalıq texnologiyalar járdeminde jetilistiriw, ilimiy joybarlarda qatnasıw imkaniyatların keńeytiw, sport hám mádeniyat ilajların kóbeytiw sıyaqlı máseleler dodalandı. Ushırasıwda studentler tárepinen kitapxana fondın keńeytiw, qosımsha dógereklerdi shólkemlestiriw, jańa magistratura qánigeliklerin ashıw, sport hám mádeniyat ilajların kóbeytiw sıyaqlı máseleler átirapında sorawlar hám usınıslar bildirildi.
Rektor barlıq soraw hám usınıslardı itibar menen tıńlap, olarǵa juwap berdi. Ayırım máseleler ornında sheshildi, ayırımları boyınsha tiyisli bólimlerge tapsırmalar berildi. Atap aytqanda, kelesi oqıw jılına universitette jańa studentler turaq jayınıń paydalanıwǵa tapsırılatuǵınlıǵı, qosımsha sport dógerekleri hám shet tilleri kursların shólkemlestiriw, kitapxana fondın jańa ádebiyatlar menen bayıtıw rejelestirilip atırǵanın málim etti.
Ilaj sońında rektor A.Reymov barlıq student-jaslardı óz umtılısları hám baslamaları menen universitettiń rawajlanıwına úles qosıwǵa shaqırdı. Sonday-aq, universitet administraciyası jaslardıń hár qanday mashqala hám usınısları menen ashıq-aydın sóylesiwge tayar ekenin jáne bir márte atap ótti.
«Rektor hám jaslar» ushırasıwı studentler hám basshılar arasında qızǵın pikirlesiw ortalıǵın jaratqan halda, keleshektegi rejelerdi belgilep alıw ushın áhmiyetli platforma boldı. Bunday ilaj jaslardıń belsendiligin arttırıwǵa hám universitet turmısında jáne de belsene qatnasıwına xızmet etetuǵını sózsiz.

Qaraqalpaqstan xabar agentligi