Qaraqalpaqstan Respublikası Joqarǵı Keńesiniń baslaması menen Xalıq deputatları rayonlıq, qalalıq Keńesleri deputatlarına oqıw seminarların ótkeriw belgilengen bolıp, orınlarda ilajlar dawam etpekte. Usı baǵdardaǵı oqıw-seminarı Qanlıkól rayonında da bolıp ótti. Onda xalıq deputatları rayonlıq Keńesi deputatları, sekretariat baslıǵı, siyasiy partiya baslıqları qatnastı.

Ilajdı Xalıq deputatları Qanlıkól rayonlıq Keńesi baslıǵı B.Sultanov basqarıp bardı. Qaraqalpaqstan Respublikası Joqarǵı Keńesiniń 13-yanvar kúngi arnawlı xatına tiykarlanıp ótkerilgen oqıw seminarda deputatlar tárepinen 5 jıl dawamında ámelge asırılıwı tiyis wazıypalar belgilengen.
Bul boyınsha Ózbekstan «Milliy tiklanish» demokratiyalıq partiyası Qaraqalpaqstan Respublikası Keӊesi baslıǵı orınbasarı Z.Tajixojaeva, Ózbekstan «Adolat» SDP Qaraqalpaqstan Respublikası Keӊesi baslıǵı orınbasarı Sh.Tóreshova, ÓzXDP Qaraqalpaqstan Respublikası Keӊesi baslıǵı orınbasarı M.Esengeldiev, Ózbekstan Еkologiyalıq partiyası Qaraqalpaqstan Respublikası Keӊesi baslıǵı A.Begimovalar búgingi kúnde deputatlar aldında turǵan wazıypalar haqqında keӊ túrde túsinikler berdi.
Seminar dawamında bayanatshılar tárepinen deputat xızmetiniń nızamlı tiykarları, saylawshılar, múrájatler menen islesiwde olardıń atqaratuǵın xızmeti hám juwapkershiligin arttırıw, sonday-aq, ádep-ikramlılıq qaǵıydaları haqqındaǵı máseleler kórip shıǵıldı.
Ilajda deputatlardıń saylanǵan okrugi aymaǵındaǵı mashqalalar, mámleketlik baǵdarlamanıń tiyisli mámleketlik uyımlar tárepinen orınlanıwı ústinen baqlaw, máhálle belsendileri menen islesiwdi kúsheytiw boyınsha wazıypaları belgilenip alındı.

Qaraqalpaqstan xabar agentligi