Ózbekstanda 3 millionǵa shamalas 3-7 jasar bala bar. Olardı mektepke shekemgi bilimlendiriw menen qamtıp alıw dárejesi 74 procentti quraydı. Mámlekette bul kórsetkishti 2026-jılǵa shekem 80 procentke, 2030-jılǵa barıp, 100 procentke jetkeriw rejelestirilgen.

Mektepke shekemgi bilimlendiriw mákemelerinde balalardı rawajlandırıw hám olardı mektepke tayarlaw procesinde fizikalıq jaqtan jetilistiriw, olardıń sóylew mádeniyatın hám oylawın keńeytiw sonıń menen birge ruwxıy jaqtan rawajlandırıw sıyaqlı úsh basqıshta ámelge asırıladı.
Bizge belgili, belgilengen tártipke bola, mektepke shekemgi bilimlendiriw shólkemine baratuǵın balalar ushın olardıń ata-anaları tárepinen tólem ámelge asırıladı.
Xosh, bir shańaraqtan eki hám onnan artıq perzent baqshaǵa barsa, baqsha tólemleri ushın jeńillik berile me!
Ministrler Kabinetiniń 2024-jıl 29-apreldegi «Mámleketlik mektepke shekemgi bilimlendiriw shólkemlerinde balalar támiynatı ushın ata-analar tólemi muǵdarların tastıyıqlaw haqqında»ǵı qararında 2025-jıl 1-yanvardan baslap mámleketlik mektepke shekemgi bilimlendiriw shólkemlerinde balalar támiynatı ushın ata-analar tóleminiń jańa muǵdarları belgilengen. Mámleketlik mektepke shekemgi shólkemge bir shańaraqtan baratuǵın bir bala ushın óz aldına, eki hám onnan artıq balalar ushın óz aldına ata-analar tólemi belgilengen.
Bul tártipti Tashkent qalası mısalında alatuǵın bolsaq, belgili bir shańaraqtan mámleketlik mektepke shekemgi shólkemniń 9 saatlıq toparına baratuǵın bir bala ushın 272 mıń sum, sol shańaraqtan tap usı mámleketlik mektepke shekemgi shólkemniń 9 saatlıq toparına baratuǵın eki hám onnan artıq balalardıń hár biri ushın 194 mıń sum tólenedi.

M.Toshqoraeva, ÓzA