Usı kúnleri Ózbekstan Respublikası Еkonomika hám qarjı ministrligi delegaciyası Malayziya mámleketinde bolmaqta.
Sapar sheńberinde ózbek delegaciyası Kuala-Lumpur qalasındaǵı «SME Corporation Malaysia» agentliginiń jumısı menen jaqınnan tanıstı.

Bunnan soń ekonomika hám qarjı ministriniń orınbasarı – Ózbekstan Respublikası Ministrler Kabineti janındaǵı Makroekonomikalıq hám aymaqlıq izertlewler institutı direktorı Umid Obidxwjaev hám «SME Corporation Malaysia» agentliginiń bas direktorı Rizal Dato Naini arasında ushırasıw ótkerildi. Onda Ózbekstan hám Malayziya arasındaǵı ekonomikalıq birge islesiwdiń perspektivalı baǵdarları dodalandı.
Atap ótilgenindey, «SME Corporation Malaysia» (SME Corp. Malayziya) Malayziya Isbilermenlik hám kooperativlerdi rawajlandırıw ministrligi janında tiykarǵı muwapıqlastırıwshı uyım sıpatında jumıs alıp baradı. Onıń tiykarǵı wazıypası Malayziyada sanı 1,1 millionǵa teń bolǵan kishi hám ortasha kárxanalardı qollap-quwatlaw hám rawajlandırıw milliy baǵdarlamaların ámelge asırıwdan ibarat.
«SME Corporation Malaysia» agentligi bul baǵdarlamalardı muwapıqlastırıw, monitoring hám nátiyjeliligin bahalawdı da ámelge asıradı.
Agentlik mámleket ishinde de, xalıqaralıq maydanda da kishi hám ortasha kárxanalardı rawajlandırıwǵa umtılıp, xalıqaralıq birge islesiwde belsene qatnaspaqta. Ol óz jumısı sheńberinde treningler hám texnikalıq birge islesiwdi shólkemlestiriw boyınsha hár qıylı baǵdarlamalar baslaması menen shıǵadı.
Ilimiy mákeme baspasóz xızmetine bola, ushırasıwda «SME Corporation Malaysia» agentligi tárepinen avtomatlastırıw hám sanlastırıw nátiyjesinde ónimdarlıqtı arttırıw arqalı jumısshı kúshi jetispewshiligi mashqalasın sheshiwge qaratılǵan qarjılandırıw baǵdarlamaları, sonday-aq, Texnikalıq hám kásip-óner bilimlendiriwi hám treningler (TVET) sistemaları arqalı kásiplik tayarlaw baǵdarlamaları usınıs etildi.
Sonday-aq, onda kishi hám orta biznesti rawajlandırıw, sonıń ishinde, tiyisli ministrlik hám uyımlar tárepinen tarawǵa baylanıslı baǵdarlamalardı ámelge asırıwda tájiriybe almasıw máseleleri dodalandı.
Sóylesiw waqtında Gig-ekonomikası sıyaqlı kishi hám orta biznesti rawajlandırıw hám sanlı transformaciyanıń zamanagóy talaplarına beyimlesiw ushın iykemlesiwsheń biznes modellerdiń áhmiyeti ayrıqsha atap ótildi.
Ushırasıwda ESG Quick Guide, SME Competitiveness Rating for Enhancement (SCORE) reyting sisteması sıyaqlı qurallardı Ózbekstan kontekstinde qollanıw, sonday-aq, jergilikli hám xalıqaralıq bazar talapların qanaatlandırıw ushın birgeliktegi treninglerdi shólkemlestiriwge kelisildi.
Sóylesiwler sońında keleshektegi birge islesiw baǵdarları, sonıń ishinde, tájiriybe almasıw ushın birgeliktegi bilimlendiriw baǵdarlamaların hám vebinarlardı shólkemlestiriw belgilep alındı.

N.Ziyodullaeva, ÓzA