Prezidentimizdiń tapsırması menen Qaraqalpaqstan Respublikasında puqaralardıń mashqalaların úyreniw hám sheshimin tabıw boyınsha respublikalıq jumısshı topar dúzilip, bul baǵdarda orınlarda kóshpeli qabıllawlardı shólkemlestiriw boyınsha wazıypalar belgilengen.

Beruniy rayonında Ámiwdárya, Beruniy, Tórtkúl hám Ellikqala rayonlarınan kelgen puqaralar ushın respublikalıq sektor jáne ministrlikler menen shólkemlerdiń basshıları tárepinen múrájatler hám xalıqtı qıynap kiyatırǵan mashqalalarǵa sheshim tabıw boyınsha kóshpeli qabıllaw ótkerildi.
Qabıllawda Ózbekstan Respublikası Joqarǵı sudı baslıǵınıń orınbasarı Sh.Polvonov hám Joqarǵı sudtıń apparat baslıǵı A.Xolmaxmatovlar puqaralardıń sud sistemasına baylanıslı múrájatlerin tıńladı.
Qabıllawda jámi 219 múrájat bildirildi. Sonnan 78 múrájat sud sistemasına tiyisli boldı. Sonıń 38 i jınayat, 5 i hákimshilik, 30 ı puqaralıq, 5 i ekonomikalıq sudlawǵa baylanıslı máselelerdi quradı.
Awız eki hám jazba túrde múrájatler qabıllanǵan kóshpeli qabıllaw barısında 39 múrájat iyesine tiykarlanǵan huqıqıy túsinikler berildi.
Usı kúni usınısnamalar hám bildirilgen ótinishlerge muwapıq jazasın ótep atırǵan 8 shaxs jınayat isleri boyınsha sudlar tárepinen jazanı ótewden múddetinen aldın shártli túrde azat etildi. Al, 6 puqaranıń belgilengen hákimshilik jaza múddetin azaytıw boyınsha múrájatleri de úyrenilip, unamlı sheshim taptı.
Puqaralıq isleri boyınsha sudlar tárepinen 9 puqaranıń aliment óndiriwge baylanıslı múrájatleri tiykarında sud buyrıǵı shıǵarılıp, orınlawǵa qaratıldı. Sonday-aq, 5 puqaranıń miynet haqısın óndiriwge baylanıslı múrájatı qanaatlandırıldı. Pensiya hám napaqa alıw, miyras múlkin rásmiylestiriw baǵdarındaǵı hújjetlerdegi qáte-kemshilikler sebepli pensiya tayınlanılmay atırǵan 8 puqaranıń yuridikalıq faktti belgilew haqqındaǵı múrájatleri de qanaatlandırıldı. Sonıń menen birge, 3 isbilermenlik subyektine sud qararları ústinen shaǵım etiw tártibi túsindirildi.
Kóshpeli qabıllawda múrájatleri unamlı sheshimin tapqan 10 puqara Ózbekstan Respublikası Prezidentine sud-huqıq tarawında alıp barılıp atırǵan ádil hám durıs siyasatı ushın minnetdarshılıq bildirip, jazba túrde alǵısnamalar usındı.

Qaraqalpaqstan xabar agentligi