Ózbekstan Respublikası Prezidenti Shavkat Mirziyoev 21-yanvar kúni Yaponiya xalıqaralıq birge islesiw agentligi (JICA) prezidenti Akixiko Tanaka basshılıǵındaǵı delegaciyanı qabılladı.

Bul jetekshi sırt el qarjı institutı menen ámeliy birge islesiwdi keńeytiw hám birgeliktegi baslamalardı alǵa qoyıw máseleleri kórip shıǵıldı.
Mámleketimiz jetekshisi JICA basshısınıń usı rettegi saparı ekonomikalıq hám qarjı-texnikalıq tarawlardaǵı birge islesiwdiń jańa basqıshın baslap beretuǵının minnetdarshılıq penen atap ótti. Agentliktiń Jańa Ózbekstandı qurıw baǵdarındaǵı reformalardı qollap-quwatlawda strategiyalıq birge islesiw sıpatındaǵı ornı atap atap ótildi.
Ózbekstan –Yaponiya insan resursların rawajlandırıw orayı hám Jaslar innovaciya orayı nátiyjeli jumıs alıp barmaqta.
Agentlik arqalı 2,5 mıńnan aslam ózbekstanlı qánige Yaponiyada oqıdı hám ámeliyat ótedi. Usı mámleketten kelgen kewilliler Ózbekstanda áhmiyetli sociallıq hám gumanitarlıq joybarlardı ámelge asırıwǵa úles qospaqta.
Bunnan tısqarı, kúni keshe Tashkent qalasında Respublikalıq qánigelestirilgen nevrologiya hám insult ilimiy-ámeliy medicina orayın qurıw hám úskenelew haqqındaǵı kelisimge qol qoyıldı.
Ózbekstan Prezidenti JICAnıń mámleketimizdegi jumısın keńeytiw baǵdarındaǵı rejelerdi qollap-quwatladı.
Jeke menshik sektor joybarların ámelge asırıw, yaponiyalı investorlar ushın arnawlı ekonomikalıq zona shólkemlestiriw, Yaponiya universitetin ashıw, sonday-aq, professional bilimlendiriw tarawında birge islesiw áhmiyetli ekenligi atap ótildi.
“Jol kartası” tiykarında engiziw hám perspektivalı joybarlardı alǵa qoyıwdıń jańa mexanizmlerin qollanıwǵa kelisip alındı.

ÓzA