Prezident Shavkat Mirziyoev 21-yanvar kúni qusshılıqtı rawajlandırıw hám jaylawlardan nátiyjeli paydalanıw ilajları boyınsha prezentaciya menen tanıstı.

Bul tarmaqlar xalıqtıń azıq-awqat qáwipsizligin hám arzanlıǵın támiyinlewde áhmiyetli orın iyeleydi. Sońǵı jıllardaǵı sharayatlar hám joybarlar nátiyjesinde ónimdarlıq izbe-iz artıp barmaqta. Bul pátti dawam ettirip, usı jılı 1 million tonna tawıq góshi, 10 milliard 500 million máyek jetistiriw mólsherlengen. Еksporttı 2 esege arttırıp, 180 million dollarǵa alıp shıǵıw názerde tutılǵan.
Qusshılıqta 1 mıń 350 joybardı iske qosıp, 3 million 200 mıń tonna gósh jetistiriw, 13 million tonnadan aslam sút alıp, onıń 30 procentin sanaat usılında qayta islew esap-sanaq etilgen.
Prezentaciyada bul kórsetkishlerge erisiw boyınsha usınıslar kórip shıǵıldı.
Máselen, elimizde gósh baǵdarındaǵı qustıń 1-tártipli genetikasın shólkemlestiriw baslanǵan. Sırt el kompaniyaları menen birgelikte endi onı máyek jetistiriw boyınsha da jolǵa qoyıw mólsherlenbekte.
Qusshılıq kooperaciyası boyınsha Ándijan, Namangan, Samarqand hám Xorezmde jaqsı tájiriybeler bar. Onda hám adamlar dáramat tappaqta, hám qusshılıq kárxanalarınıń jumısları júrispekte.
Máselen, Qwshrabot rayonındaǵı «Jeti ǵáziyne» kárxanası xojalıqlarǵa shanshılǵan tawıq, ketek hám jem tarqatıp, máyegin ózi satıp almaqta.
Bunday joybarlardı barlıq wálayatlarda islep, ónim hám jumıs orınların kóbeytiw zárúr ekenligi atap ótildi. Oǵan 50 million dollar qaratılatuǵını belgilendi.
Waqtınsha toqtap qalǵan yamasa az quwatlıqta islep atırǵan qusshılıq kárxanaların qarjılay salamatlandırıp, jumısın jaqsılaw boyınsha kórsetpeler berildi.
Xalıq ırısqısınıń jáne bir úlken dáregi – jaylawlar. Biraq olardıń derlik yarımınan paydalanılmay atır. Sebebi, jaylaw ósimlikleri tuqımgershiligi rawajlanbaǵan, suw obyektleri hám qudıqlar jetispey atır. Bunday maydanlardıń kartası hám ijarası sanlastırılmaǵan.
Sonıń ushın jaylawlardı Veterinariya hám sharwashılıqtı rawajlandırıw komiteti sistemasına ótkeriw usınıs etilmekte. «E-yaylov» elektron kartası islep shıǵılıp, hár bir maydan bul sistemaǵa kirgiziledi. Onda sharwa, egin yamasa geologiyaǵa mólsherlengen orınlar anıq kórinedi.
Bunday maydanlar eń kóp bolǵan 7 wálayatta jaylaw xojalıqları shólkemlestiriledi. Olar toǵay xojalıqları sıyaqlı jaylawlardı saqlaw hám nátiyjeli paydalanıwǵa juwapker boladı. Jaylaw xojalıqlarındaǵı jerler aukcion arqalı mal baǵıw, piste, badam sıyaqlı nállerdi egiw ushın xalıqqa 30 jılǵa ijaraǵa beriledi.
Mámleketimiz basshısı usınıslardı maqullap, jaylawlardı degradaciyadan shıǵarıw, qosımsha qudıqlar qazıw hám jaylaw tuqımgershiligin shólkemlestiriw boyınsha tapsırmalar berdi.
Bıyıl 500 mıń gektar jaylawda 1 million bas qoydı tártipli baǵıw boyınsha úlgi joybar ámelge asırılatuǵını aytıldı.
Sharwashılıq hám qusshılıq kárxanaların qarjılay qollap-quwatlaw máseleleri dodalandı. Jańa joybarlar hám kooperaciya esabınan xalıqtıń bántligin arttırıp, kámbaǵallıqtı qısqartıw zárúr ekenligi atap ótildi.

ÓzA