Saudiya Arabstanında bolıp ótken «Future Minerals Forum 2025» dúnya taw-kán sanaatı hám metallurgiya tarawında áhmiyetli waqıyalardan biri boldı. Forum dawamında 100den aslam mámleketlerden kelgen qánigeler, sanaat jetekshileri hám siyasatshılardıń qatnasıwında mineral resurslar hám metall sanaatın rawajlandırıwǵa baǵıshlanǵan keń tarmaqlı ushırasıwlar shólkemlestirildi, dep xabar beredi xs.uz.

Ózbekstan texnologiyalıq metallar kombinatı (ÓzTMK) delegaciyası forumda belsene qatnasıp, InfraVia, Toronto Stock Exchange, Trafigura, Beacon, Ximei Resources, Traxys hám usı sıyaqlı xalıqaralıq kólemdegi 50 ge shamalas iri kompaniyalar menen sóylesiwler alıp barıp, perspektivalı birge islesiw qatnasıqların jolǵa qoydı.
Qalaberdi, konferenciya dawamında ÓzTMK wákilleri taw-kán sanaatı ushın jasalma intellektte qánigelesken «Intellisense.io» jetekshi kompaniyası menen memorandumǵa qol qoyıwǵa eristi. Bul jasalma intellektti texnologiyalıq metallar tarawı hám óndiris processlerine engiziw boyınsha mámleketimizde áhmiyetli ózgerislerdi baslap beriwdegi tiykarǵı qádemlerden biri bolıp esaplanadı. Bul kelisim mineral resurslardı izlew hám qazıp alıw processlerin jáne de anıǵıraq hám nátiyjeli etiw, óndiris processlerin avtomatlastırıw, qorshaǵan ortalıqtı qorǵaw ushın nátiyjeli monitoring sistemaların engiziwge járdem beredi.
«Ózbestan biz ushın ayrıqsha qızıǵıwshılıq oyatatuǵın strategiyalıq aymaq. Bul mámlekettiń izbe-iz rawajlanıwı, taw-kán sanaatındaǵı úlken potencialı tán alınıwǵa ılayıq. Ózbekstan Texnologiyalıq Metallar Kombinatı menen qol qoyılǵan sheriklik shártnaması da biziń bul tarawda birge islesiwge bolǵan isenimimizdi jáne bir márte tastıyıqlaydı hám bul qádemdi birgeliktegi tabıslardıń baslanıwı sıpatında bahalaymız», – deydi «Intellisense.io» kompnaiyasınıń tiykarın salıwshısı hám bas direktorı Sem Boz.
Sonday-aq, kombinat wákilleri Oraylıq Aziya jetekshileri ushın «EIT RawMaterials» aymaqlararalıq orayı tárepinen shólkemlestirilgen dógerek sáwbetinde de qatnastı. Onda taw-kán sanaatı, qayta tiklenetuǵın energiya derekleri, infrastrukturanı integraciyalaw hám usı sıyaqlı bir qatar máseleler kórip shıǵıldı.
2024-jılda Prezident Shavkat Mirziyoevtiń baslaması menen shólkemlestirilgen Ózbekstan texnologiyalıq metallar tarawın rawajlandırıw jolında xalıqaralıq dárejedegi iri kompaniyalar menen tabıslı birge islesiwdi keńeytiwdi dawam etedi.

Qaraqalpaqstan xabar agentligi