«Paxta shiyki zatın jetistiriw hám satıwda bazar mexanizmlerin qollanıwdı izbe-iz dawam ettiriw ilajları haqqında»ǵı Prezident Pármanı qabıl etildi.

Pármanǵa bola, 2025-jıl paxta óniminen:
– Ózbekstan respublikalıq shiyki zat birjası kalendar jılınıń 1-noyabr kúninde (2025-jıldıń ónimi ushın 1-fevralda) paxta talshıǵınıń Nyu-York birjasındaǵı fyuchers kotirovkalarınıń aqırǵı 6 aydaǵı ortasha kotirovkasınan kelip shıqqan halda kelesi jıldıń ónimi ushın paxta shiyki zatınıń baslanǵısh bahasın (birinshi sort, ekinshi klass) anıqlap, Birjanıń rásmiy veb-saytında járiyalaydı;
múlkshilik túrine qaramastan barlıq paxta shiyki zatın jetistiriwshi xojalıqlar hám klasterler sonday-aq, paxta shiyki zatın qayta islew hám iyirilgen jip islep shıǵarıw shınjırına iye toqımashılıq kárxanaları arasında paxta shiyki zatın jetkerip beriw boyınsha aldı-sattı (fyuchers, forvard hám spot) shártnamaları Birjanıń paxta shiyki zatı sekciyasında hár bir aymaq boyınsha ayrıqsha ótkeriletuǵın sawdalarda dúziledi;
– xojalıqlar hám qayta islewshiler arasında dúziletuǵın shártnamalar táreplerdiń erkin tańlawı tiykarında ótkeriletuǵın birja sawdaları arqalı xojalıqlar tárepinen jetkerip beriw múddetlerin hám bir yamasa bir neshe qarıydardı erkin túrde tańlaw arqalı rásmiylestiriledi;
– Birjada barlıq shártnamalar «Agroplatforma» málimleme sisteması menen integraciyalanǵan maǵlıwmatlar bazasında bar xojalıqlar hám qayta islewshiler arasında dúziledi.
Pármanǵa muwapıq, 2025-jıl paxta óniminen:
– fyuchers shártnamaları kalendar jıldıń 1-noyabrinen keyingi jıldıń 1-iyunine shekem xojalıqlar hám qayta islewshiler arasında birjada erkin qáliplesetuǵın, biraq járiyalanǵan baslanǵısh bahadan tómen bolmaǵan bahada dúziledi;
– forvard shártnamaları kalendar jıldıń 1-noyabrinen keyingi jıldıń 1-martına shekem xojalıqlar hám qayta islewshiler arasında óz-ara kelisilgen bahalarda dúziledi;
– spot shártnamaları real waqıt rejiminde qoymaxanada saqlanıp atırǵan paxta shiyki zatı kólemine xojalıqlar hám qayta islewshiler arasında óz-ara kelisilgen bahada dúziledi;
– saqlaw qoymaxanaları yamasa ijara shártnamaları joq xojalıqlar ózi jetistiretuǵın paxta shiyki zatı boyınsha hár ónim jılınıń 1-martına shekem forvard yamasa 1-iyunine shekem fyuchers shártnamaların rásmiylestiredi;
Sonday-aq, 2025-jıl óniminen paxta shiyki zatın óz qarjıları hám kommerciyalıq kreditler esabınan jetistirip, Birjada satqan xojalıqlarǵa qáliplesken esap bet faktura bahasınıń 10 procenti muǵdarında subsidiya ajıratıladı.
Bunnan tısqarı, paxta shiyki zatın jetistiriw ushın alınǵan jeńilletilgen kreditlerdi ónim jılınıń juwmaǵına (tiyisli jıldıń 31-dekabrine) shekem qaytarǵan xojalıqlarǵa bul kreditler boyınsha tólengen procent tólemleriniń 4 procentlik punktin subsidiya sıpatında qaytarıp beriw tártibi engiziledi.

ÓzA